ٹی وی ڈراموں کے مایہ ناز اداکار شکیل انتقال کرگئے
ان کے مقبول ڈراموں میں شہ زوری، انکل عرفی، انتظارفرمائیے،ان کہی، زیر زبر پیش، افشاں،انا، عروسہ اورآنگن ٹیڑھا شامل ہیں
ٹیلی ویژن کے باکمال اداکار شکیل احمد 85 سال کی عمر میں انتقال کرگئے۔
ایکسپریس نیوز کے مطابق ڈراموں کے لیجنڈری اداکار علیل اور چار روز سے نجی اسپتال میں داخل تھے۔
چھوٹی اسکرین کے نام ور اداکار نے متعدد ڈراموں میں باکمال اداکاری اور یادگار کرداروں سے شہرت پائی۔ ان کے مقبول ڈراموں میں شہ زوری، انکل عرفی، انتظارفرمائیے، ان کہی، زیر زبر پیش، افشاں، انا، عروسہ اور آنگن ٹیڑھا شامل ہیں۔ اس کے علاوہ پی ٹی وی کے تاریخی ڈراموں میں بھی آپ نے اپنی اداکاری کے جوہردکھائے تھے۔
سینیئر اداکار نے کچھ فلموں میں بھی اداکار ی کے جوہر دکھائے جن میں ہونہار، جوش انتقام، ناخدا، بادل اور بجلی، جی دار، چاہت اور زہرعشق شامل ہیں، تاہم انہیں اصل پہچان ڈراموں ہی سے ملی۔
شکیل احمد کا اصل نام یوسف کمال تھا مگر شوبز کی دنیا میں آنے کے بعد انہیں شکیل کا نام دیا گیا۔
خاندانی ذرائع کے مطابق کئی سال پہلے شکیل کا بائی پاس بھی ہوا تھا اور انہیں جوڑوں کا مرض بھی لاحق تھا، جس کی وجہ سے چلنے پھرنے میں دشواری ہوتی تھی، اس لیے ایک ملازم انہیں چلنےپھرنے میں مدد فراہم کرتا تھا۔
خاندانی ذرائع کے مطابق مرحوم اداکار کی بیٹی آج صبح 6 بجے کی فلائٹ سے کراچی پہنچیں گی اور آج یعنی بروز جمعہ بعد نماز عصر ان کی نماز جنازہ ادا کی جائے گی۔
مرحوم اداکار کے پسماندگان میں ان کی اہلیہ فرحی، بیٹی حرا اور بیٹا حیدر شامل ہیں۔
وزیراعلیٰ سندھ، وزیرخارجہ کا اظہارافسوس
وزیراعلیٰ سندھ سید مراد علی شاہ نے سینیئر اداکار شکیل احمد کے انتقال پر گہرے دکھ کا اظہار کرتے ہوئے کہا ہے کہ شکیل احمد فن کی دنیا کا بہت بڑا نام تھے، ان کی خدمات ہمیشہ یاد رکھی جائیں گی۔
وزیر اعلیٰ نے مرحوم کے بلند درجات کے لیے دعا بھی کی۔
دریں اثنا وزیرخارجہ بلاول بھٹو زرداری نے اداکار شکیل کے انتقال پر گہرے دکھ اور افسوس کا اظہار کرتے ہوئے کہا کہ مرحوم کے اہلخانہ سے تعزیت کا اظہار کرتا ہوں، وہ فن کی دنیا کا ایک انمول نام تھے۔
چیئرمین پیپلزپارٹی نے مزید کہا کہ پاکستانی فلموں، تھیٹر اور ڈراموں میں ان کی اداکاری کا سحر ہمیشہ قائم رہے گا۔