عیدِ قرباں اور سرحدوں پر تعینات پاک فوج کے جوانوں کی عید
ایسی بہت سی عیدیں قوم کی حفاظت کے لیے قربان کرنے کے لیے تیار ہیں، سندھ رینجزز
مشرقی ومغربی سرحدوں پر معمور افواجِ پاکستان کے بہادر اور جَری جوان آج بھی اپنوں سے دور عید کے موقع پر بھی دفاعِ وطن کے لئے ملک دُشمنوں کے سامنے سینہ سپر ہیں۔
پاک آرمی کے یہ محافظ سیاچن کے برف پوش پہاڑوں سے لے کر بلوچستان کی سنگلاخ چٹانوں تک، سندھ کے تپتے صحرائوں سے لے کر وزیرستان کے پہاڑوں تک اپنی عیدیں سرحدوں کی حفاظت کے لئے قربان کرتے آرہے ہیں۔
سر زمین شمالی وزیرستان سے پاک فوج کے آفیسرز اور جوانوں کی جانب سے عید الاضحی کے پر مسرت موقع پر خصوصی پیغام میں کہا گیا ہے کہ پاکستانی قوم کو عید کی خوشیاں مبارک ، ہم اپنی قوم کی خوشیوں کی حفاظت کے لیے ہمہ وقت تیار ہیں۔
پاک فوج کے آفیسرز اور جوانوں کا کہنا تھا کہ شمالی وزیرستان کی زرخیز سرزمین بہت سی قربانیوں سے حاصل کی گئی ہے جس میں پاک فوج کے آفیسرز اور جوانوں کا خون شامل ہے۔
پاکستانی قوم عید کی خوشیاں بھر پور طریقے سے منائے کیونکہ پاک فوج کے جوان انکی حفاظت کے لیے ہر دم تیار کھڑے ہیں۔
ان کا کہنا تھا کہ ہم عید کے موقع پر اپنی ڈیوٹی پر ہیں اور ایسی بہت سی عیدیں قوم کی حفاظت کے لیے قربان کرنے کے لیے تیار ہیں۔