اداروں کیخلاف فیٹف عالمی مالیاتی فنڈز کو خط لکھنے والوں کیخلاف کارروائی کا فیصلہ

جرائم پیشہ افرادنے ڈریپ کیخلاف آئی ایم ایف اور ورلڈبینک کوخطوط لکھ کرپاکستان پر پابندیاں لگانے کامطالبہ کیا تھا،ذرائع

INP July 03, 2023

محکمہ صحت کا کارروائی کیلیے ایف آئی اے اور انٹیلی جنس ایجنسیوں سے رجوع کرنے کا فیصلہ (فوٹو:فائل)

ملکی اداروں کیخلاف فنانشل ایکشن ٹاسک فورس (فیٹف)کو خط لکھنے پر وفاقی حکومت نے جرائم پیشہ افراد کیخلاف کارروائی کا فیصلہ کرلیا۔

نجی ٹی وی کے مطابق جرائم پیشہ افراد نے فیٹف، عالمی مالیاتی فنڈ (آئی ایم ایف)اور ورلڈ بینک کو ملکی اداروں بالخصوص ڈرگ ریگولیٹری اتھارٹی آف پاکستان (ڈریپ) کیخلاف خط لکھے تھے جس میں پاکستان پر پابندیاں لگانے کا مطالبہ کیا گیا تھا۔

ذرائع کا کہنا ہے کہ کچھ فارماسسٹس کی جانب سے بین الاقوامی مالیاتی اداروں کو خطوط اور ای میل لکھی گئیں تھیں اور الزام لگایا گیا تھا کہ پاکستانی ادارے منی لانڈرنگ میں ملوث ہیں۔

یہ بھی پڑھیں: آئی ایم ایف مذاکرات کی کامیابی سے متعلق سوال پر اسحاق ڈار سیخ پا، صحافی کا موبائل چھیننے کی کوشش

حکام کا کہنا ہے کہ غیر ملکی اداروں کو اس قسم کے خطوط لکھنا غداری کے زمرے میں آتا ہے، یہ وہ افراد ہیں جن پر پاکستان میں جعلی ادویات اور بلیک میلنگ کے مقدمات ہیں۔

ذرائع کے مطابق محکمہ صحت کے حکام نے کارروائی کے لیے ایف آئی اے اور انٹیلی جنس ایجنسیوں سے رجوع کرنیکا فیصلہ کیا ہے تاکہ ان افراد کے خلاف غداری کے مقدمات قائم کیے جاسکیں۔