لاہور 39 سالہ خاتون کو قتل کرنے والا ملزم گرفتار

فوٹو : ایکسپریس نیوز

---

ہیٔر کے علاقے میں 39سالہ خاتون کے قتل کے الزام میں ملوث شخص کو گرفتار کر لیا گیا۔

ایس ایس پی انویسٹی گیشن ڈاکٹر انوش مسعود نے واقعے کی تفصیلات بتاتے ہوئے کہا کہ مقتولہ شازیہ نجی یونیورسٹی میں صفائی کا کام کرتی تھی اور گرفتار ملزم نعمان کے مقتولہ کے ساتھ تعلقات تھے، دو ماہ قبل ملزم کی شادی کسی اور جگہ ہوگئی لیکن ملزم اور مقتولہ کا آپس میں رابطہ رہا۔

ابتدائی تفتیش کے مطابق ملزم نے شازیہ بی بی سے تعلقات کا راز ظاہر ہونے کے ڈر سے قتل کا منصوبہ بنایا، ملزم نعمان موٹر سائیکل پر شازیہ کو نجی یونیورسٹی سے ساتھ لے کر آیا جہاں ملزم نے گلے پر قینچی کے پے در پے وار کرکے قتل کیا اور فرار ہوگیا۔

ایس ایس پی انویسٹی گیشن نے ہیٔر پولیس ٹیم کو ملزم کی فوری گرفتاری کا حکم دیا تھا۔ ڈاکٹر انوش مسعود کا کہنا ہے کہ پولیس پراسیکیوشن پارٹنر شپ کی مدد سے ملزم کو سخت سزا دلوائی جائے گی۔