شعیب اختر نے اپنی بائیوپک بنانے والوں کیخلاف اسٹے آرڈر حاصل کرلیا

مقدمے کے حتمی فیصلے تک فلم کی شوٹنگ اور ریلیز پر پابندی عائد کردی گئی (فوٹو: ایکسپریس ویب)

---

لیجنڈری پاکستانی کرکٹر شعیب اختر نے اعلان کیا ہے کہ انہوں نے اپنی بائیوپک بنانے والوں کے خلاف اسٹے آرڈر حاصل کرلیا ہے جبکہ مقدمے کے حتمی فیصلے تک فلم کی شوٹنگ اور ریلیز پر پابندی عائد کردی گئی ہے۔

سابق اسپیڈ اسٹار شعیب اختر نے ٹوئٹر پر اسٹے آرڈر کی تصویر شیئر کرتے ہوئے کیپشن میں لکھا کہ میری زندگی پر ممکنہ طور پر بننے والی فلم کے خلاف اسٹے آرڈر محفوظ ہے، مجھے یہ کرنا پڑا کیونکہ انہوں نے معاہدے کے قانونی خاتمے سے قطع نظر فلم کی شُوٹنگ جاری رکھنے کی تحریری دھمکی دی تھی۔

شعیب اختر نے اپنی بائیو پک کے پروڈیوسر/ڈائریکٹر کے خلاف مقدمہ دائر کیا، جو فریقین کے درمیان معاہدہ ختم ہونے کے باوجود فلم کی تیاری میں مسلسل دھمکیاں دے رہے ہیں۔

مزید پڑھیں: شعیب اختر کی بائیو پک میں کردار ادا کرنے والے 'اداکار' کا نام سامنے آگیا

اس سے قبل سابق کرکٹر نے فلم میکرز اور انتظامیہ کو متنبہ کیا کہ اگر وہ ان کی سوانح عمری پر فلم بناتے رہے اور ان کے نام یا زندگی کی کہانی کے واقعات کو کسی بھی طرح استعمال کیا تو انکے سخت قانونی کارروائی عمل میں لائیں گے۔

شعیب اختر نے بیان میں کہا تھا کہ بہت افسوس کے ساتھ میں آپ سب کو بتانا چاہتا ہوں کہ مہینوں کے غور و فکر کے بعد میں نے اپنی انتظامیہ اور قانونی ٹیم کے ذریعے معاہدہ ختم کرتے ہوئے فلم راولپنڈی ایکسپریس سے خود کو الگ کرلیا تھا، یقینی طور پر یہ میرا خواب تھا جسے میں حقیقت کا رنگ دینا چاہتا تھا لیکن بدقسمتی سے معاملات ٹھیک نہیں ہوئے اور ہمیں فلم کو روکنا پڑا۔

مزید پڑھیں: شعیب اختر نے ''راولپنڈی ایکسپریس'' بائیو پِک سے خود کو الگ کرلیا

گزشتہ سال جولائی میں شعیب اختر نے فلم کا پوسٹر شیئر کرتے ہوئے اعلان کیا تھا کہ 13 نومبر 2023 کو راولپنڈی ایکسپریس ریلیز ہوجائے گی تاہم رواں سال کے آغاز میں اداکار عمیر جسوال نے فلم کرنے سے انکار کردیا تھا۔

عمیر نے اپنے ٹوئٹ میں روالپنڈی ایکسپریس چھوڑنے کا اعلان کرتے ہوئے لکھا تھا کہ تخلیقی اور ذاتی وجوہات کی بنا پر میں نے شعیب اختر کی بائیوپک پروجیکٹ راولپنڈی ایکسپریس سے الگ ہونے کا فیصلہ کیا ہے۔

Important announcement. Stay order secured against supposed biopic on my life. Details attached. pic.twitter.com/G9mpZTPulo

— Shoaib Akhtar (@shoaib100mph) July 4, 2023