ہوٹلوں کو سپلائی کی جانے والی مردہ مرغیوں کی گاڑی پکڑی گئی

پولیس نے بوریوںمیںرکھی200مردہ مرغیاں ضبط کرکے ڈرائیورکودھرلیا،مردہ مرغیوں سے لدی2گاڑیاںپہلے بھی پکڑی گئی تھیں ۔ فوٹو : فائل

---

اسٹیل ٹاؤن پولیس نے نیشنل ہائی وے کے قریب چیکنگ کے دوران مردہ مرغیاں ہوٹلوں کو سپلائی کرنے والی سوزوکی پک اپ کو پکڑ کر اس میں رکھی بوریوں سے 200 مردہ مرغیاں برآمد کر کے ڈرائیور کو گرفتار کرلیا۔

مردہ مرغیاں ملیر کے مختلف علاقوں کے ہوٹلوں کو سپلائی کی جانی تھیں جو پولیس نے بروقت کارروائی کرتے ہوئے پکڑ لیں۔

اس حوالے سے ایس ایچ او اسٹیل ٹاؤن نند لال نے بتایا کہ سب انسپکٹر یارمحمد کی سربراہی میں پولیس پارٹی نیشنل ہائی وے سومار گوٹھ موڑ کے قریب گاڑیوں کی چیکنگ میں مصروف تھی کہ اس دوران گھارو سے کراچی آنے والی سفید رنگ کی سوزوکی پِک اَپ رجسٹریشن نمبر کے ڈبلیو 3443 کو روک کر اس کی تلاش لی تو عقب میں رکھے ہوئے بوروں سے مردہ مرغیاں برآمد ہوئیں۔

پولیس نے گاڑی کے ڈرائیور رضوان کو گرفتار کرکے تھانے منتقل کر دیا اور مقدمہ درج کرلیا۔

نند لال نے بتایا کہ گرفتار ڈرائیور نے ابتدائی تحقیقات میں بتایا کہ مردہ مرغیاں ملیر کے علاقوں گلشن حدید، اسٹیل ٹاؤن اور ملیر سٹی سمیت ملحقہ علاقوں میں قائم ہوٹلوں پر سپلائی کی جاتی ہیں۔

واضح رہے کہ چند ہفتے قبل عوامی کالونی پولیس نے بھی مردہ مرغیوں سے لدی مال بردار گاڑیوں کو پکڑ کر کئی افراد کو گرفتار کیا تھا، ملزمان نے بھی انکشاف کیا تھا کہ وہ مردہ مرغیوں کو نیشنل ہائی وے پر مختلف ہوٹلوں پر سپلائی کرتے ہیں تاہم پولیس ہوٹل مالکان کو نہ پکڑ سکی۔