مغربی کنارے میں چھاپہ مار کارروائی کے دوران اسرائیلی فوجی ہلاک

اسرائیلی فوج نے جنین پناہ گزین کیمپ میں مسلسل 44 گھنٹے کا سرچ آپریشن بند کردیا؛ فوٹو: ٹوئٹر

---

مغربی کنارے کے علاقے جنین کے پناہ گزین کیمپ میں اسرائیلی فوج نے سرچ آپریشن کیا جس کے دوران نامعلوم جانب سے آنے والی گولی لگنے سے ایک اہلکار ہلاک ہوگیا۔
عالمی خبر رساں ادارے کے مطابق اسرائیلی فوج نے مغربی کنارے میں جنین پناہ گزین کیمپ کا محاصرہ کرکے گھر گھر تلاشی لی۔ 44 گھنٹے تک جاری رہنے والے محاصرے کے دوران اسرائیلی فوج کا ایک افسر گولی لگنے سے ہلاک ہوگیا۔

اپنے اہلکار کی ہلاکت پر خوف زدہ اسرائیلی فوج نے اسی وقت محاصرہ ختم کرکے فوجی بیس کی راہ لی۔ 44 گھنٹے جاری رہنے والے سرچ آپریشن میں اسرائیلی فوج کی جارحیت میں 12 فلسطینی نوجوان شہید جب کہ 120 زخمی ہوگئے تھے۔

اسرائیلی فوج نے سرچ آپریشن کے دوران دو بار جنین پناہ گزین کیمپ پر فضائی حملے بھی کیے تھے اور سرچ آپریشن کے دوران انتہائی مطلوب عسکریت پسند فلسطینی رہنماؤں کو گرفتار کرنے کا بھی دعویٰ کیا تھا۔

اسرائیلی فوج نے یہ دعویٰ بھی کیا تھا کہ سرچ آپریشن کے دوران دیسی ساختہ بارودی مواد بھی برآمد ہوا ہے جس سے ایک حملے میں اسرائیلیوں کو نشانہ بنایا گیا تھا۔