توہینِ الیکشن کمیشن فواد چوہدری کے ناقابل ضمانت وارنٹ گرفتاری جاری

(فوٹو: فائل)

---

الیکشن کمیشن نے فواد چوہدری کے ناقابل ضمانت وارنٹ گرفتاری جاری کردیے۔

سابق وفاقی وزیر اطلاعات فواد چوہدری کے خلاف توہین الیکشن کمیشن کیس کی سماعت ہوئی، جس میں الیکشن کمیشن نے فواد چوہدری کے ناقابل ضمانت وارنٹ گرفتاری جاری کردیے۔

چیف الیکشن کمشنر کی سربراہی میں 5 رکنی کمیشن نے کیس کی سماعت کی، جس میں فواد چوہدری کے معاون وکیل الیکشن کمیشن میں پیش ہوئے اور کیس ملتوی کرنے کی درخواست کی۔

دوران سماعت اسلام آباد پولیس کے اہل کار نے بتایا کہ میں فواد چوہدری کے وارنٹ کی تعمیل کے لیے ان کی رہائش گاہ گیا، جہاں ان کے بھائی فیصل چوہدری ملے اور انہوں نے کہا کہ ان کے خلاف سیاسی مقدمات ہیں، وہ ہمیں بھی نہیں ملے۔

ممبر الیکشن کمیشن نے استفسار کیا کہ کیا فواد چوہدری آئے ہیں؟وہ نہ خود آئے اور نہ ہی استثنا کی کوئی درخواست دی ہے۔ جس پر معاون وکیل نے جواب دیا کہ ہائی کورٹ میں آج وکیلِ الیکشن کمیشن نے دلائل دینے ہیں۔ کیس ملتوی کردیں کیوں کہ ہائی کورٹ ایک دو دن میں فیصلہ کردے گی۔

الیکشن کمیشن نے معاون وکیل فواد چوہدری کی جانب سے کی گئی استدعا مسترد کردی اور توہین الیکشن کمیشن کیس میں فواد چوہدری کے ناقابل ضمانت وارنٹ گرفتاری جاری کردیے۔ الیکشن کمیشن نے فواد چوہدری کے خلاف توہین کمیشن کیس کی سماعت 20 جولائی تک ملتوی کردی۔