چیئرمین پی سی بی ذکا اشرف کا کپتان بابراعظم سے ٹیلیفونک رابطہ

آپ کے پچھلے دور میں بھی پاکستان نے ایشیاکپ جیتا تھا، انشااللہ اس بار بھی جیتیں گے، کپتان (فوٹو: ایکسپریس ویب)

---

پاکستان کرکٹ بورڈ (پی سی بی) مینجمنٹ کمیٹی کے سربراہ ذکا اشرف نے قومی کرکٹ ٹیم کے کپتان بابراعظم سے ٹیلیفونک رابطہ کیا ہے۔

ذرائع کے مطابق کپتان بابراعظم نے ذکا اشرف کو چئیرمین مینجمنٹ کمیٹی کا عہدہ سنبھالنے پر مبارکباد دی جبکہ نو منتخب چیئرمین نے سری لنکا کے خلاف سیریز نیک خواہشات کا اظہار کرتے ہوئے ایشیاکپ کے حوالے سے بھی گفتگو کی۔

اس موقع پر کپتان بابراعظم نے کہا کہ آپ کے پچھلے دور میں بھی پاکستان نے ایشیاکپ جیتا تھا، انشااللہ اس بار بھی ایشیاکپ جیت کر پاکستان لائیں گے۔ ٹیم کی فتوحات کا گراف مزید اوپر لے جانے کیلئے 100 فیصد کارکردگی دکھانے کی کوشش کریں گے۔

مزید پڑھیں: ذکا اشرف کی سابق کپتان راشد لطیف سے پی سی بی ہیڈ کوارٹر میں ملاقات

چیئرمین پی سی بی ذکا اشرف نے کہا کہ سری لنکا میں مثبت کرکٹ کھیلیں، ہار کا خوف ذہن سے نکال کر میدان میں اتریں۔ گرین شرٹس کی جیت پر پوری قوم کو خوشی ملتی ہے، ہماری ٹیم میں بہت ٹیلنٹ ہے۔

مزید پڑھیں: ذکا اشرف کی محمد حفیظ کو پی سی بی میں چیف سلیکٹر کی پیشکش

گزشتہ روز مینجمنٹ کمیٹی کے سربراہ ذکا اشرف کی سابق کپتان راشد لطیف سے پی سی بی ہیڈ کوارٹر میں ملاقات ہوئی تھی، جس میں پاکستان کرکٹ کے معاملات کو درست کرنے پر پیشرفت کی گئی تھی۔

واضح رہے کہ پی سی بی مینجمنٹ کمیٹی کے سربراہ ذکا اشرف نے سابق کپتان محمد حفیظ کو چیف سلیکٹر بننے کی پیشکش کی تھی۔