خیبرپختونخوا کے علاقے مردان میں شرپسندوں کی پولیس موبائل پر فائرنگ سے ڈی ایس پی شدید زخمی ہوگئے۔

ایکسپریس نیوز کے مطابق مردان کے علاقے کاٹلنگ میں نامعلوم شرپسندوں نے ڈی ایس پی کی معمول کے گشت پر مصروف پولیس موبائل پر اندھا دھند فائرنگ کی۔

فائرنگ کے نتیجے میں ڈی ایس پی کاٹلنگ فاروق زمان شدید زخمی ہوئے جنہیں طبی امداد کے لیے اسپتال منتقل کردیا گیا ہے۔

واقعے کے بعد پولیس کی بھاری نفری نے موقع پر پہنچ کر شواہد جمع کیے اور دہشت گردوں کی تلاش کے لیے داخلی اور خارجی راستوں کی نگرانی سخت کردی۔