سلمان خان کو بگ باس کی میزبانی کے دوران سگریٹ پینے پر کڑی تنقید کا سامنا
دوسروں کو بھاشن دیتے ہیں اور خود نیشنل ٹی وی پر سگریٹ نوشی کر رہے ہیں، سوشل میڈیا صارف
بالی ووڈ کے سُپر اسٹار اور میزبان سلمان خان کی رئیلٹی شو بگ باس او ٹی ٹی سیزن 2 کی میزبانی کے دوران سگریٹ نوشی کی ویڈیو اور تصاویر وائرل ہو گئیں۔
سوشل میڈیا کے مختلف پلیٹ فارمز پر سلمان خان کی ایک ویڈیو گردش کر رہی ہے جس میں دیکھا جا سکتا ہے کہ اداکار شو کی میزبانی کرتے ہوئے سگریٹ نوشی کر رہے ہیں اور انہوں نے کیمرے کے سامنے بھی ہاتھ میں سگریٹ پکڑ رکھی ہے۔
سوشل میڈیا صارفین کی جانب سے سلمان خان کو اس ویڈیو کے سامنے آنے کے بعد شدید تنقید کا نشانہ بنایا جارہا ہے۔
ایک صارف نے ویڈیو پر تبصرہ کرتے ہوئے لکھا کہ یہ دوسروں کو بھاشن دیتے ہیں اور خود نیشنل ٹی وی پر سگریٹ نوشی کر رہے ہیں۔
ایک اور صارف نے کہا کہ گزشتہ قسط میں جب آکنشاہ پوری اور جد حدید نے ان کے شو میں ایک دوسرے کا بوسہ لیا تو سلمان خان نے کنٹسٹنٹ کو کہا تھا کہ یہ ہماری ثقافت کا حصہ نہیں ہے تو کیا سگریٹ نوشی ثقافت کا حصہ ہے۔
ایک صارف نے سلمان خان کو منافق قرار دیتے ہوئے کہا کہ اگر آپ دوسروں کو لیکچر دے رہے ہیں تو کم سے کم ان کے سامنے خود تو اچھے رہیں۔