قرآن پاک کی بیحرمتی گھناؤنا عمل ہے جس کا کوئی جواز قبول نہیں سعودی عرب

عالمی برادری ایسے واقعات کی روک تھام کے لیے اپنا کردار ادا کرے، سعودی وزیر خارجہ کا سلامتی کونسل سے خطاب

ویب ڈیسک July 12, 2023

سویڈن میں ایک شقی القلب شخص نے قرآن پاک کے اوراق کو جلایا تھا؛ فوٹو: فائل

سعودی عرب نے سویڈن میں قرآن پاک کو جلانے کی ناپاک جسارت کی شدید الفاظ میں مذمت کرتے ہوئے کہا کہ ایسے گھناؤنے کام کا کوئی جواز قبول نہیں۔

عالمی خبر رساں ادارے کے مطابق سعودی وزیر خارجہ شہزادہ فیصل بن فرحان نے انسانی حقوق کونسل کے ہنگامی اجلاس سے ورچوئل خطاب میں بین المذاہب ہم آہنگی کے فروغ پر زور دیتے ہوئے کہا کہ عالمی برداری توہین مذہب کے واقعات کے سدباب کے لیے اپنی بھرپور توانیاں صرف کرے۔

یہ خبر پڑھیں : طالبان کا قرآن کی بیحرمتی پر معافی کا مطالبہ، سویڈن کی سرگرمیاں معطل

سعودی وزیر خارجہ نے مزید کہا کہ انتہا پسندوں کی جانب سے قرآن پاک کو نذر آتش کرنا رواداری کی اقدار کے منافی ہے اور یہ نفرت، تعصب اور نسل پرستی کو ہوا دیتا ہے۔ مسلمانوں کی مقدس کتاب کو بار بار جلانا تشویشناک ہے۔

مزید پڑھیں: کویت کا سویڈش زبان میں قرآن پاک کے ایک لاکھ نسخے شائع کرنے کا اعلان

وزیر خارجہ فیصل بن فرحان نے اقوام متحدہ کو مخاطب کرتے ہوئے کہا کہ سعودی عرب مذہبی منافرت کا مقابلہ کرنے کے لیے پیش کی گئی قرارداد کے مسودے کی منظوری کا منتظر ہے۔ عالمی برادری اور تنظیموں کو ایسے جارحانہ واقعات کو روکنے کے لیے اقدامات کرنا ہوں گے۔

یہ خبر بھی پڑھیں : سویڈن میں عید گاہ کے باہر قرآن پاک کا نسخہ نذرآتش

یاد رہے کہ سویڈن میں عید الاضحیٰ کے روز مرکزی مسجد کے باہر انتہا پسند رہنما نے قرآن پاک کے اوراق کو جلانے کی ناپاک جسارت کی تھی جس کی عالمی سطح پر شدید الفاظ میں مذمت کی جا رہی ہے۔