لاہور میں رکشا ڈرائیور کی طالبہ کے ساتھ دست درازی کی کوشش

پنجاب یونیورسٹی کی ایک طالبہ کو رکشہ ڈرائیور کی طرف سے ہراساں کیے جانے کا واقعہ سامنے آیا ہے

---

شہر میں رکشہ کی سواری بھی خواتین کے لیے غیر محفوظ ہوتی جا رہی ہے، رکشہ میں اکیلے سفر کرنے والی خواتین کو رکشہ ڈرائیوروں کی طرف سے ہراساں کیے جانے کے واقعات میں اضافہ ہونے لگا ہے۔

پنجاب یونیورسٹی کی ایک طالبہ کو رکشہ ڈرائیور کی طرف سے ہراساں کیے جانے کا واقعہ سامنے آیا ہے۔

پنجاب یونیورسٹی ہاسٹل کی رہائشی طالبہ کی طرف سے تھانہ مسلم ٹاؤن میں دی گئی درخواست میں کہا گیا ہے کہ طالبہ نے پنجاب یونیورسٹی (آئی بی اے) اسٹاپ سے دھرم پورہ جانے کے لیے آٹو رکشہ لیا، رکشہ ڈرائیور نے رکشہ چلاتے ہی اپنے موبائل فون پر اونچی آواز میں غیر اخلاقی ویڈیو دیکھنا شروع کر دی اور منع کرنے کے باوجود ویڈیو بند نہیں کی۔

ہم لوگ ہیلتھ ڈیپارٹمنٹ کی پورن ویڈیو پر ہنگامہ کر رہے ، لیکن پی یو کی طالبہ کیساتھ چند روز قبل ایسا ہی واقعہ ہوا، رکشہ والے نے طالبہ کو بٹھاتے ہی رکشے میں پورن ویڈیو چلا دی، دست درازی بھی کی، پولیس میں درخواست بھی دی مقدمہ درج نہیں ہو رہا. یہ کیمپس پل پر چھٹا واقعہ ہے pic.twitter.com/NSVhN3te85

— Amjad Hussain Bukhari (@AmjadHBokhari) July 15, 2023

اسی دوران 25 سالہ رکشہ ڈرائیور نے کیمپس پُل انڈر پاس کے ساتھ خرابی کا بہانہ کر کے رکشہ روک دیا اور ٹھیک کرنے کے بہانے پچھلی سیٹ پر بیٹھی طالبہ کا نقاب کھینچ لیا اور دست درازی کی کوشش کی تاہم طالبہ کے شور مچانے پر لوگ اکھٹے ہوگئے اور رکشہ ڈرائیور فرار ہوگیا۔

ایکسپریس سے بات کرتے ہوئے متاثرہ طالبہ نے بتایا کہ انہوں نے اس واقعے کے خلاف پولیس کو درخواست دی تھی لیکن ایک ہفتہ گزر جانے کے باوجود ابھی تک ایف آئی آر بھی درج نہیں کی جاسکی۔ انہوں نے کہا کہ پولیس کا ان کا ساتھ رویہ غیر مناسب تھا۔

انہوں نے کہا یہ بدقسمتی ہے کہ ایسے واقعات پر کوئی نوٹس نہیں لیتا، انہوں نے ہمت کی اور ملزم کے خلاف درخواست دی ہے لیکن اس کے باوجود کوئی کارروائی نہیں ہوئی، نجانے کتنی خواتین کو روزانہ ایسی صورتحال کا سامنا کرنا پڑتا ہے۔ ہمارے ادارے اس وقت حرکت میں آتے ہیں جب کوئی حادثہ رونما ہوجاتا ہے۔