آئل مارکیٹنگ کمپنیوں کی ڈیزل کی قیمت میں کمی کی مخالفت

روپے کی قدر میں کمی، غیر مناسب مارجن، بلند شرح سود کے باعث پہلے ہی مشکلات کا سامنا ہے

Business Reporter July 18, 2023

روپے کی قدر میں کمی، غیر مناسب مارجن، بلند شرح سود کے باعث پہلے ہی مشکلات کا سامنا ہے فوٹو: فائل

آئل کمپنیز ایڈوائزری کونسل (او سی اے سی) حکومت کی جانب سے ڈیزل کے نرخ میں 7 روپے لیٹر کمی کے فیصلہ پر تحفظات کا اظہار کرتے ہوئے کہا ہے کہ اس اقدام کے نتیجے میں ڈیزل پر آئل مارکیٹنگ کمپنیوں کے پریمیئم میں کمی کے باعث انھیں ڈیزل کی فروخت پر 12 روپے 79 پیسہ لیٹر کا نقصان ہوگا۔

او سی اے سی کے چیئرمین وقار احمد صدیقی کی جانب سے چیئرمین اوگرا کو لکھے گئے ایک مراسلے میںکہا گیا ہے کہ ای سی سی کے 28جولائی 2020کو طے کردہ پرائسنگ فارمولے کے تحت ڈیزل کی قیمتوں میں اضافہ ہونا تھا، تاہم حکومت نے ڈیزل کے نرخ میں7روپے لٹر کمی کا اعلان کرکے آئل مارکیٹنگ کمپنیوں کیلیے مالی مشکلات کھڑی کردی ہیں۔

گزشتہ دو ماہ کے دوران کھپت میں کمی کے باعث اس وقت ملک میں ڈیزل کے ذخائر7لاکھ ٹن سے زائد کی سطح پر موجود ہیں جبکہ پی ایس او نے جولائی میں ڈیزل در آمد نہیں کیا ہے، جون میں درآمد کردہ ڈیزل پر آئل مارکیٹنگ کمپنیوں کا پریمیئم11ڈالر50سینٹس بنتا ہے، تاہم قیمتوں میں کمی کیلیے حکومت نے جولائی کیلیے ڈیزل پر پریمیئم4ڈالر20سینٹ کردیا ہے۔

یہ بھی پڑھیں: حکومت کا عوام کو تحفہ، پیٹرول کی فی لیٹر قیمت میں 9 روپے کمی کا اعلان

پریمیئم میں 7ڈالر 30سینٹ کمی کے باعث آئل مارکیٹنگ کمپنیوں کو ڈیزل کی فروخت پر12روپے79روپے لٹر کا نقصان ہوگا، اور محض ایک ماہ کے دوران آئل مارکیٹنگ کمپنیوں کو 11ارب روپے کے نقصان کا سامنا کرنا پڑے گا۔

او سی اے سی کے چیئرمین نے مراسلے میں مزید لکھا ہے کہ آئل مارکیٹنگ کمپنیوں کیلیے روپے کی قدر میں کمی، غیر مناسب مارجن، بڑھتی ہوئی شرح سود، اور عالمی سطح پر بڑھتی ہوئی مہنگائی کے باعث اپنے آپریشنز میں پہلے ہی انتہائی مشکلات کا سامنا ہے اور ایسے فیصلے آئل مارکیٹنگ کمپنیوں کیلیے مزید رکاوٹوں کا باعث بن سکتے ہیں جس کے نتیجے میں نہ صرف ملک میں پٹرولیم مصنوعات کی فراہمی متاثر ہونے کا خدشہ ہے بلکہ متعدد کمپنیوں کے آپریشنز کا چلنا بھی مشکل ہو سکتا ہے۔