ایمرجنگ ایشیاکپ کی جیت ٹیم اسپرٹ کا نتیجہ ہے محمد حارث

فوٹو: پی سی بی میڈیا

---

پاکستان شاہینز کے کپتان محمد حارث نے ایمرجنگ ایشیاکپ کی جیت پر خوشی کا اظہار کرتے ہوئے اسے کوچنگ اسٹاف کی محنت اور ٹیم اسپرٹ کا نتیجہ قرار دیا ہے۔

یاد رہے کہ پاکستان شاہینز نے فائنل میں انڈیا اے کو 128 رنز سے شکست دے کر ٹائٹل کا کامیابی سے دفاع کیا ہے۔ پاکستان شاہینز ٹائٹل کا کامیابی سے دفاع کرنے کے بعد آج سری لنکا سے وطن واپس روانہ ہوگی۔

کپتان محمد حارث نے پی سی بی ڈیجیٹل سے خصوصی گفتگو کرتے ہوئے کہا کہ فائنل میں انڈیا اے کو شکست دینے کے بعد ہم سب بہت پرجوش ہیں۔ اچھی بات یہ ہے کہ سینئر ٹیم یہاں ہے اور وہ بھی جیت کا جشن ہمارے ساتھ منا رہی ہے۔

مزید پڑھیں: پاکستان نے بھارت کو شکست دیکر ایمرجنگ ایشیا کپ جیت لیا

انہوں نے کہا کہ جب ہم گروپ مرحلے میں انڈیا اے کے خلاف ہار گئے، تو اس نے ہمیں اچھی ویک اپ کال دی اور ہار سے ہمیشہ بہت اچھا سبق ملتا ہے۔ ہمیں یقین تھا کہ اگر ہم غلطیوں سے سبق سیکھیں گے تو فائنل میں انڈیا اے کو شکست دیں گے۔

حارث نے کہا کہ کھلاڑیوں نے غیر معمولی جواب دیا کیونکہ ہم نے ٹورنامنٹ میں مختلف کمبی نیشن آزمائے۔ ہم نے کھلاڑیوں کو زیادہ سے زیادہ مواقع دینے کی کوشش کی اور اس سے ٹیم کو آخر میں اچھی کارکردگی میں مدد ملی۔

مزید پڑھیں: ایمرجنگ ایشیا کپ میں بھارت کو شکست؛ 'کام ایسے کیا جاتا ہے' ، شاہد آفریدی

حارث نے کہا کہ میں نے فائنل سے پہلے پاکستان ٹیم کے سینئر کھلاڑیوں سے بات کی تھی۔ فائنل سے پہلے ٹیم سے بابر اعظم کی ملاقات کھلاڑیوں کے لیے بہت حوصلہ افزا تھی۔

محمد حارث کا کہنا ہے کہ میرے لیے یہ جیت بہت اطمینان بخش ہے کیونکہ میں نے دو فائنلز (آئی سی سی مینز ٹی ٹوئنٹی ورلڈ کپ اور اے سی سی مینز ایمرجنگ ایشیا کپ) میں حصہ لیا ہے اور اے سی سی کا ٹائٹل جیتا ہے اس لیے اس جیت کا جشن بھرپور انداز میں مناؤں گا۔