پاناما کیس جماعت اسلامی نے سپریم کورٹ کے 9 سوالات کے جوابات جمع کرادیے

عدالت سے پاناما اسکینڈل فہرست میں شامل 436 افراد کیخلاف جے آئی ٹی تشکیل دینے کی درخواست

ویب ڈیسک July 25, 2023

عدالت سے پاناما اسکینڈل فہرست میں شامل 436 افراد کیخلاف جے آئی ٹی تشکیل دینے کی درخواست

سپریم کورٹ میں پاناما پیپرز میں شامل 436 افراد کیخلاف کارروائی کیلئے دائر درخواست میں پیش رفت ہوگئی۔

جماعت اسلامی نے عدالت عظمیٰ کی طرف سے پوچھے گئے 9 سوالات کا تحریری جواب جمع کرادیا۔

عدالت کا پہلا سوال تھا کہ کن حالات کے پیش نظر جماعت اسلامی کی پہلے آنے والی درخواست کو پاناما مرکزی کیس سے الگ کیا گیا؟

یہ بھی پڑھیں: 436 پاکستانیوں کی جائیدادوں کی تحقیقات کی درخواست پر سپریم کورٹ کے 9 سوالات

جماعت اسلامی نے جواب جمع کرایا کہ پاناما کیس سننے والے بنچ نے کہا تھا اگر جماعت اسلامی کا کیس سنا گیا تو فیصلے میں کئی سال لگ سکتے ہیں، بنچ نے کہا ہم پہلے نواز شریف کے کیس کو سنیں گے، بنچ کی اصل توجہ اس وقت کے وزیراعظم نواز شریف کے کیس پر تھی۔

سپریم کورٹ کا دوسرا سوال تھا کہ پاناما کیس انکم ٹیکس آرڈیننس کے دائرہ اختیار میں کیوں نہیں آتا؟

یہ بھی پڑھیں: 7 سال بعد یاد آیا کہ 436 پاکستانیوں کیخلاف جوڈیشل کمیشن بنایا جائے؟ سپریم کورٹ

جماعت اسلامی نے جواب میں کہا کہ سپریم کورٹ نے پاناما کیس فیصلے میں قرار دیا تھا ایف بی آر معاملہ میں دلچسپی نہیں لے رہا، ایف آئی اے کو یہ اختیار ہی حاصل نہیں کہ وہ پبلک آفس ہولڈر کے خلاف کارروائی کر سکے، جس طرح نواز شریف کیخلاف آہنی ہاتھوں سے نمٹا گیا پاناما فیصلے کا اطلاق اسی طرح دیگر 436 افراد پر بھی ہونا چاہیے۔

جماعت اسلامی نے مؤقف اختیار کیا کہ پاناما اسکینڈل کی فہرست میں دنیا کے گیارہ سے زائد ممالک کے افراد کے نام سامنے آئے، ان ممالک نے قانونی کارروائی کی، پاکستان میں صرف نواز شریف اور انکے اہل خانہ کے خلاف کارروائی کی گئی، پاناما اسکینڈل فہرست میں شامل 436 افراد کیخلاف جے آئی ٹی تشکیل دی جائے۔

واضح رہے کہ جسٹس سردار طارق مسعود کی سربراہی میں بنچ نے 9جون کی عدالتی کارروائی میں 9 سوالات پوچھے تھے۔