ترکیہ تیز آواز میں میوزک چلانے پر کارسوار کو قتل کردیا گیا

کارسوار تیز آواز میں گانے سن رہا تھا اور موٹر سائیکل سوار کے منع کرنے پر جھگڑا میں ہوا تھا

ویب ڈیسک August 07, 2023

ترکیہ میں تیز آواز میں میوزک سننے پر کارسوار کو موٹر سائیکل سوار نے قتل کردیا؛ فوٹو: فائل

ترکیہ میں اونچی آواز میں میوزک چلانے والے 38 سالہ شخص کو چاقو کے وار کرکے بیدردی سے قتل کردیا گیا۔

عرب میڈیا کے مطابق قتل کی یہ لرزہ خیز واردات ترکیہ کے شہر استنبول میں ہوا۔ جہاں گاڑی میں تیز آواز میں گانے سننا معمول کی بات ہے اور قتل کی وجہ بھی یہی بات بنی ہے۔

عینی شاہدین کا کہنا ہے کہ موٹر سائیکل سوار نے کار سوار کو میوزک کی آواز کم کرنے کو کہا جس پر دونوں کے درمیان جھگڑا ہوگیا اور موٹر سائیکل سوار شخص نے کار سوار کو چاقو کے وار کرکے قتل کردیا۔

پولیس نے بتایا کہ مقتول کی شناخت سنان چلیشکانیل کے نام سے ہوئی ہے جسے راہگیر شدید زخمی حالت میں اسپتال لائے تاہم وہ دوران علاج چل بسا جب کہ قاتل فرار ہوگیا جسے اب تک گرفتار نہیں کیا جا سکا۔

سی سی ٹی وی فوٹیجز میں کار سوار کو خون میں لت پت دیکھا جا سکتا ہے جس پر موٹر سائیکل سوار مسلسل چاقو کے وار کر رہا ہے۔ راہگیروں نے ملزم کو پکڑنے کی کوشش کی لیکن وہ ہاتھ نہ آیا۔