صدر مملکت کو قومی اسمبلی تحلیل کرنے کی سمری آج بھیج دوں گا وزیراعظم

قرض سے بہتر ہے کہ ہم فقیری میں زندگی بسر کرلیں اور قرض سے جان چھڑائیں، وزیراعظم کا اسلام آباد میں تقریب سے خطاب

ویب ڈیسک August 09, 2023

وزیراعظم کا اسلام آباد کے کنونشن سینٹر میں تقریب سے خطاب

وزیراعظم شہباز شریف نے کہا ہے کہ حکومت کی مدت مکمل ہونے کے بعد قومی اسمبلی کی تحلیل کے لیے صدر مملکت کو سمری آج ارسال کردوں گا۔

اسلام آباد کے کنونشن سینٹر میں منعقدہ سولر ٹیوب ویلز سے متعلق تقریب میں خطاب کرتے ہوئے وزیراعظم نے کہا کہ حکومت کی مدت ختم ہونے سے پہلے شمسی توانائی کا منصوبہ شروع کیا، اُن ممالک میں بھی سول سسٹم چل رہے ہیں جہاں سورج ہر وقت نہیں ہوتا جبکہ ہمارے ملک میں سال کے 12 مہینے سورج رہتا ہے، حکومت سستی بجلی فراہم کرنے کے لیے شمسی توانائی پر تمام شعبوں کو منتقل کرنے کی کوشش کررہے ہیں۔

انہوں نے کہا کہ صدر مملکت کو حکومت اور اسمبلی تحلیل کرنے کی سفارش کردوں گا، جس کے بعد معاملات نگراں حکومت کے ہاتھ میں چلے جائیں گے مگر امید ہے کہ شمسی توانائی کا منصوبہ چلتا رہے گا تاکہ مستقبل میں پاکستان اور شہریوں کو سستی بجلی مل سکے۔

وزیراعظم نے کہا کہ بجلی ہر طبقے اور شہری کی ضرورت ہے اور اس کی فراہمی بھی ضروری ہے، ملک میں آنے والی کسی بھی حکومت کا اولین فرض سستی بجلی فراہم کرنا ہے۔ انہوں نے کہا کہ گزشتہ 15 ماہ میں ہم نے سستی بجلی کیلیے شمسی توانائی کے منصوبے پر کام شروع کیا مگر آئی ایم ایف پروگرام اور اُس کی مشکلات کیوجہ سے پروگرام پر دھیان نہیں دے سکے۔

مزید پڑھیں: نگراں وزیر اعظم کی تقرری، شہباز شریف اور اپوزیشن لیڈر میں مذاکرات آج ہوں گے

وزیراعظم نے کہا کہ اگر آئی ایم ایف کا پروگرام نہ ہوتا اور پاکستان ڈیفالٹ کرجاتا تو ادویات کیلیے قطاریں لگی ہوتیں اور دوائیں دستیاب نہ ہوتیں، جان بچانے والی دوائیوں کے لیے لوگ مارے مارے پھرتے، پیٹرول پمپوں پر لائنیں لگی ہوتیں، ہمارے زرمبادلہ کے ذخائر مزید کم ہوتے جس کو بچانے کے لیے ہم اپنی درآمدات کو مزید کم کرتے تاکہ زرمبادلہ بچا سکیں۔

شہباز شریف کا کہنا تھا کہ درآمدات بند ہونے کی صورت میں صنعتیں بند ہوتیں اور بے روزگاری بڑھ جاتی، عالمی بینک ہمارے ساتھ کام نہیں کرتے اور امپورٹ کے لیے ایل سیز نہیں کھلتیں اور وہ ہمارے بینکس پر بھروسہ نہیں کرتے، ایسے میں بھیانک صورت حال پیدا ہوتی اور افراتفری مچ جاتی۔

یہ بھی پڑھیں: پاکستان کی 15ویں قومی اسمبلی آج تحلیل کردی جائے گی

انہوں نے کہا کہ آئی ایم ایف سے معاہدہ ہوا جس کی شرائط بہت کڑی اور سخت ہیں، مگر ہم اس پروگرام کے بعد ڈیفالٹ سے بچ گئے اور اللہ نے پاکستان کو بڑی پریشانی سے بچایا۔

وزیراعظم نے کہا کہ مسئلہ آئی ایم ایف پروگرام نہیں بلکہ مستقبل کے معاشی اہداف ہیں، ہمیں ملک کو ترقی دینے کے لیے زراعت کے پہیے کو تیزی سے گھمانا ہوگا اور سستی توانائی کے منصوبوں پر جانا ہوگا، آئی ایم ایف نے بھی توانائی پر سبسڈی دینے پر ہمارے ہاتھ پیر باندھ دیے ہیں جس کی وجہ سے شہریوں کو مہنگی بجلی مل رہی ہے۔

اسے بھی پڑھیں: وفاقی کابینہ اور قومی اسمبلی کا الوداعی اجلاس طلب

انہوں نے مزید کہا کہ قرض سے بہتر ہے کہ ہم فقیری میں زندگی بسر کرلیں اور قرض سے جان چھڑائیں۔