قرآن کی بے حرمتی لبنان میں سویڈن کے سفارت خانے پر حملہ

حزب اللہ نے سویڈن کے سفیر کو ملک بدر کرنے کا مطالبہ کیا ہے

ویب ڈیسک August 10, 2023

لبنان میں سویڈن سفارت خانے پر بم حملہ، فوٹو: فائل

لبنان میں قرآن کی بے حرمتی کی اجازت دینے والے ملک سویڈن کے سفارت خانے پر حملے میں دیسی ساختہ بم پھینکا گیا۔

عالمی خبر رساں ادارے کے مطابق لبنان کے دارالحکومت بیروت میں واقع سویڈن کے سفارت خانے پر ایک شخص نے دیسی ساختہ بم مارا لیکن یہ بم پھٹ نہیں سکا اور اس حملے میں کوئی جانی نقصان نہیں ہوا۔

سویڈن کے سفارت خانے کے ایک سفارتی ذریعے نے نام ظاہر نہ کرنے کی شرط پر عالمی خبر رساں ادارے کے نمائندے کو بتایا کہ سفارت خانے کے دروازے پر ایک دیسی ساختہ بم پھینکا گیا تھا۔

یہ خبر پڑھیں : ڈنمارک میں بھی قرآن پاک جلانے کی ناپاک جسارت

سویڈن کے وزیر خارجہ ٹوبیاس بلسٹروم نے کہا کہ خوش قسمتی سے حملے میں کوئی زخمی نہیں ہوا اور عملہ محفوظ رہا۔ اس واقعے کی تحقیقات کی جا رہی ہیں۔

سویڈن میں قرآن پاک کی بے حرمتی کے بعد دیگر مسلم ممالک کی طرح لبنان میں شدید احتجاج دیکھنے کو ملا۔ حزب اللہ نے سویڈن کے سفیر کو ملک بدر کرنے کا مطالبہ کیا ہے۔

جس پر لبنانی سکیورٹی فورسز نے حملوں کے خدشے کے سودیڈن کے سفارت خانے کے اردگرد سخت حفاظتی اقدامات کیے تھے جس کے باعث حملہ آور اندر داخل نہیں ہوسکا۔

یہ خبر بھی پڑھیں : سویڈن میں ایک بار پھر قرآن پاک کی بےحرمتی؛ عراقی پرچم بھی جلایا گیا

یاد رہے کہ گزشتہ ماہ سویڈن میں دو عراقی نژاد تارکین وطن نے قرآن پاک کو جلانے کی ناپاک جسارت کی تھی جب کہ ایسی ہی ایک حرکت ڈنمارک میں کی گئی تھی۔

جس پر مسلم دنیا میں شدید غم و غصہ پایا گیا اور او آئی سی سمیت دیگر عالمی برادری نے شدید احتجاج کیا تھا۔