نگراں وزیراعظم کے نام کا فیصلہ آج متوقع ہے وزیراعظم

شہباز شریف اور راجا ریاض کی آج ملاقات میں نگراں وزیراعظم کیلیے 6 ناموں پرغور ہوگا

ویب ڈیسک August 12, 2023

حتمی فیصلے کے لیے اپوزیشن لیڈر راجا ریاض سے بھی ملوں گا، شہبازشریف:فوٹو:فائل

وزیراعظم شہباز شریف نے کہا ہے کہ نگراں وزیراعظم کے نام کا فیصلہ آج ہونے کی توقع ہے۔

اسلام آباد میں صحافیوں سے گفتگو میں وزیراعظم شہباز شریف نے کہا کہ آئین کے مطابق نگراں وزیراعظم کی تقرری کے لیے 8 دن کا وقت ہے تاہم نگراں وزیراعظم کے نام کا فیصلہ آج ہونے کا امکان ہے۔

وزیراعظم کا مزید کہنا تھا کہ نگراں وزیراعظم کی کی تعیناتی پر اتحادی جماعتوں کے ساتھ ملاقات کروں گا اورحتمی فیصلے کےلیے اپوزیشن لیڈر راجا ریاض سے بھی ملوں گا۔ نگراں وزیراعظم کے معاملے پر آئین میں واضح طریقہ کار ہے جس پر عمل کیا جا رہا ہے۔

مزید پڑھیں: آئین میں نگراں وزیراعظم کی تقرری کیلیے 8 دن کا وقت ہے، صدر صاحب دستور پڑھ لیں، شہباز شریف

شہباز شریف کا کہنا تھا کہ کسی بھی ایک نام پر اتفاق رائے پیدا نہ ہوا تو معاملہ پارلیمانی کمیٹی کے پاس بھیج دیا جائے گا جس کو آئین کے مطابق تین دن کے اندر فیصلہ کرنا ہو گا۔ پارلیمانی کمیٹی کی سطح پر اتفاق نہ ہونے کی صورت میں معاملہ الیکشن کمیشن کے پاس چلا جائے گا جسے دو دن میں حتمی فیصلہ کرنا ہو گا۔

وزیراعظم نے اپنی حکومت کے حوالے سے پوچھے گئے سوال کے جواب میں کہا کہ بطور وزیراعظم دور حکومت کے 16 ماہ 38 سالہ سیاسی کیریئر میں سب سے مشکل وقت تھا تاہم تمام شراکت داروں کےساتھ مل کر چیلینجز پر قابو پایا۔