روشن ڈیجیٹل اکاؤنٹس 35 ماہ میں 65 ارب ڈالر کی ریکارڈ ترسیلات زر

گزشتہ ڈیڑھ ماہ کے دوران 14ہزار کے اضافے سے روشن ڈیجیٹل اکاؤنٹس کی تعداد 6 لاکھ ہوگئی

Salman Siddiqui August 13, 2023

معاشی بحران کی وجہ سے اتحادی حکومت کے دور میں ترسیلات زر میں کمی دیکھی گئی، ماہرین (فوٹو: فائل)

اوورسیز پاکستانیوں کی جانب سے گزشتہ 35 ماہ کے دوران روشن ڈیجیٹل اکاوئنٹس کے ذریعے بھیجی گئی ترسیلات زر ریکارڈ 6.5 ارب ڈالر کی سطح پر پہنچ گئیں جبکہ روشن ڈیجیٹل اکاؤنٹس کی تعداد 6 لاکھ ہوگئی ہے۔

اسٹیٹ بینک کے جاری کردہ اعداد و شمار کے مطابق گزشتہ ڈیڑھ ماہ کے دوران روشن ڈیجیٹل اکاؤنٹس کی تعداد میں 14ہزار کا اضافہ ہوا ہے، جبکہ اس دوران 150ملین ڈالر کی ترسیلات زر ملک میں آئیں۔

فنانشل ماہرین کا کہنا ہے کہ روشن ڈیجیٹل اکاؤنٹ نے زرمبادلہ کے ذخائر کو مستحکم رکھنے میں اہم کردار ادا کیا ہے، لیکن اتحادی حکومت کے 16 ماہ کے دوران اس میں کمی دیکھی گئی ہے، جس کی بنیادی وجہ عالمی اور ملکی سطح پر جاری رہنے والا معاشی بحران تھا۔

یہ بھی پڑھیں: روشن ڈیجیٹل اکاؤنٹس کے ذریعے ترسیلات زر کا حجم 6.350 ارب ڈالر سے متجاوز

عارف حبیب لمیٹڈ کی اکنامسٹ ثنا توفیق نے امید ظاہر کرتے ہوئے کہا کہ عام انتخابات کے بعد ترسیلات زر میں اضافہ ہوگا، کیوں کہ معاشی استحکام کیلیے سیاسی استحکام ضروری ہے، نئی حکومت نیا پاکستان سرٹیفکیٹ پر منافعے کا بھی ازسرنو تعین کرے گی، جو کہ اوورسیز پاکستانیوں کی طرف سے ترسیلات زر کے حصول کا ایک بڑا ذریعہ ہے، اگرچہ اتحادی حکومت نے منافعے میں اضافہ کیا تھا، لیکن ابھی بھی مزید اضافے کی ضرورت ہے، انھوں نے کہا کہ آئی ایم ایف ڈیل کے بعد پاکستان اسٹاک ایکسچینج میں غیر ملکی سرمایہ کاری آنا شروع ہوگئی ہے۔

ثنا توفیق نے مزید کہا کہ پاکستانی معیشت رواں مالی سال کے دوران 3.5 فیصد تک گرو کرے گی، جو کہ گزشتہ سال 0.3 فیصد رہی تھی، اسٹیٹ بینک نے دعویٰ کیا ہے کہ 30جون 2024 کو غیرملکی ذرمبادلہ کے ذخائر 10 ارب ڈالر کی سطح کراس کرجائیں گے۔