مقبوضہ کشمیر میں ایک اور بھارتی فوجی کی سرکاری رائفل سے خودکشی

مقبوضہ کشمیر میں ذہنی دباؤ اور کم ہمتی کے باعث بھارتی فوج کے 600 کے قریب اہلکار اور افسران خودکشی کرچکے ہیں

ویب ڈیسک August 13, 2023

مقبوضہ کشمیر میں ذہنی دباؤ اور کم ہمتی کے باعث بھارتی فوج کے 600 کے قریب اہلکار اور افسران خودکشی کرچکے ہیں، فوٹو: فائل

مقبوضہ کشمیر میں پیراملٹری فورس کے ایک اور اہلکار نے کم ہمتی اور ذہنی دباؤ کے باعث خود کو گولی مار کر اپنی زندگی کا خاتمہ کرلیا۔

کشمیر میڈیا سروس کے مطابق جنت نظیر وادی کے ضلع پلواما میں ایک فوجی بیس میں فائرنگ کی آواز سے افسران اور اہلکاروں کی دوڑیں لگ گئیں۔ جائے وقوعہ پر ایک اہlکار کی سر میں گولی لگی خون میں لت پت لاش پڑی تھی۔

لاش کے قریب سرکاری رائفل بھی تھی۔ نیم فوجی دستے سینٹرل ریزرو پولیس فورس کے اہلکار کی لاش کو ساتھی اہلکار ملٹری اسپتال لے کر گئے جہاں ڈاکٹرز نے موت کی تصدیق کردی۔

لاش کے پاس سے خودکشی نوٹ نہیں ملا تاہم گولی جس اینگل لگی تھی اس سے ثابت ہوتا ہے کہ اہلکار نے اپنے سر پر خود گولی ماری۔ خودکشی کی وجہ کا تعین نہیں ہوسکا۔

بھارتی فوج کے ترجمان نے بتایا کہ لاش کو ضروری کارروائی کے بعد آبائی گاؤں منتقل کردیا گیا۔ واقعے کی تحقیقات کے لیے انکوائری کمیٹی تشکیل دیدی۔

واضح رہے کہ مقبوضہ کشمیر میں ذہنی دباؤ اور کم ہمتی کے باعث بھارتی فوج کے 600 کے قریب اہلکار اور افسران خودکشی کرچکے ہیں۔