امریکن بیوی کو قتل کے بعد لاش دفنانے کے دوران شوہر قبرستان سے گرفتار

ملزم پولیس کی تحویل میں (فوٹو: لاہور پولیس)

---

لاہور میں امریکن بیوی کو قتل کرکے لاش دفنانے کے دوران پولیس نے شوہر کو قبرستان سے رنگے ہاتھوں گرفتار کرلیا۔

ایکسپریس نیوز کے مطابق لاہور فیکٹری ایریا کےعلاقے بندیاں والا پل کے قریب قبرستان میں کاظم کمال خان نامی شخص رات گئے لاش دفنانے قبرستان اکیلا ہی آیا جسے اہل علاقہ نے دیکھ لیا اور پولیس کو اطلاع کی۔

معلوم ہوا ہے کہ ملزم مردہ عورت کا شوہر ہے جس نے اسے قتل کردیا تھا اور قبرستان میں خاموشی سے تدفین میں مصروف تھا کہ اسے دھر لیا گیا۔

پولیس کے مطابق خاتون کی شناخت ڈائنا کرسٹو خان کے نام سے ہوئی جسے شوہر کاظم کمال خان نے تشدد کر کے قتل کیا، پولیس اور فرانزک ٹیم نے شواہد جمع کر کے مختلف پہلوؤں پر تحقیقات کا اغاز کردیا، پولیس اور تحقیقاتی اداروں نے کارروائی کے بعد لاش پوسٹ مارٹم کے لیے ایدھی ایمبولینس کے ذریعے مردہ خانہ منتقل کردی۔



ایس پی کینٹ اویس شفیق کے مطابق پولیس نے مددگار 15 کی کال پر فوری ایکشن لیا اور کاظم خان کو گرفتار کیا، ملزم نے امریکن بیوی ڈاٸینا کرسٹو خاں کو تشدد کا نشانہ بنا کر قتل کیا، مزید حقائق پوسٹ مارٹم رپورٹ میں سامنے آئیں گے، پولیس کی مدعیت میں مقدمہ درج کرکے ملزم سے تفتیش شروع کردی ہے۔