ایشیاکپ پاک بھارت میچ میں ٹکٹس کی قیمت کیا ہوگی تفصیل سامنے آگئی

سری لنکا میں شیڈول 9 میچز کیلئے ٹکٹوں کی آن لائن بکنگ آج سے شروع ہوگی

ویب ڈیسک August 15, 2023

سری لنکا میں شیڈول 9 میچز کیلئے ٹکٹوں کی آن لائن بکنگ آج سے شروع ہوگی (فوٹو: فائل)

ایشیاکپ میں پاکستان اور بھارت کے درمیان شیڈول میچ کے ٹکٹس کی قیمتیں سامنے آگئیں۔

ایکسپریس نیوز کے مطابق سری لنکا میں شیڈول ایشیاکپ کے 9 میچز کیلئے ٹکٹوں کی آن لائن بکنگ آج سے شروع ہوگی، پاکستان اور بھارت کے درمیان میچز کے ٹکٹس کی قیمیتیں 20 ڈالر سے شروع ہوں گی جبکہ وی وی آئی پی ٹکٹس 500 ڈالر میں دستیاب ہوگا۔

قبل ازیں پاکستان کی میزبانی میں ہونے والے میچز کی ٹکٹس کی فروخت کا آغاز 12 اگست سے کردیا گیا تھا، پی سی بی ایونٹ میں 4 میچز کی میزبانی کرے گا۔

مزید پڑھیں: ایشیاکپ کیلئے ٹکٹس کی آن لائن فروخت کا آغاز

بورڈ کے اعلامیے میں کہا گیا تھا کہ پاکستان میں شیڈول ایشیاکپ میچز کیلئے سستا ترین ٹکٹ 1500 روپے سے شروع ہوگا جو 8 ہزار روپے تک دستیاب ہوگا جبکہ مہنگا ترین ٹکٹ وی وی آئی پی کیلئے 10 ہزار روپے بُک ہوگا۔

واضح رہے کہ ایشیاکپ کا افتتاحی میچ 30 اگست کو ملتان میں پاکستان اور نیپال کے درمیان کھیلا جائے گا، 31 اگست کو کینڈی میں بنگلا دیش اور سری لنکا کی ٹیمیں مد مقابل ہوں گی، روایتی حریف پاکستان اور بھارت کے درمیان میچ دو ستمبر کو کینڈی میں کھیلا جائے گا جبکہ ایشیاکپ کا فائنل 17 ستمبر کو کولمبو میں ہوگا۔

مزید پڑھیں: ایشیاکپ؛ میچز کب ہوں گے؟ میچ کی ٹائمنگ کا اعلان ہوگیا

پاکستان چار میچز کی میزبانی کرے گا

ایشیا کپ کے تیرہ میچوں کے لیے چار وینیوز کا انتخاب کیا گیا ہے۔ جن میں سے پاکستان چار میچوں کی میزبانی کرے گا۔ ملتان میں ایک جبکہ لاہور میں تین میچ کھیلے جائیں گے۔

سری لنکا 9 میچز کی میزبانی کرے گا

سری لنکا میں نو میچز ہوں گے جن میں سے کینڈی میں تین اور کولمبو میں چھ میچز کھیلے جائیں گے۔

سری لنکا میں کینڈی پہلے راؤنڈ کے تین میچوں کی میزبانی کرے گا جس کے بعد کولمبو میں سپر فور مرحلے کے پانچ میچوں کے علاوہ 17ستمبر کو ہونے والا فائنل بھی کھیلا جائے گا۔