ورلڈکپ کی رونقیں شروع آئی سی سی نے 2 میسکوٹ متعارف کروا دیئے

شائقین 27 اگست تک نام دیں گے، ٹرافی نے کویت اور بحرین میں جلوہ دکھا دیا

Sports Reporter August 20, 2023

شائقین 27 اگست تک نام دیں گے، ٹرافی نے کویت اور بحرین میں جلوہ دکھا دیا۔ فوٹو: آئی سی سی

ورلڈ کپ کی رونقیں شروع ہوگئیں جب کہ آئی سی سی نے 2 میسکوٹ متعارف کروادیے۔

آئی سی سی نے ورلڈکپ 2023 کیلیے 2 میسکوٹ متعارف کروا دیے،یہ مرد و خواتین کی نمائندگی کرتے ہیں، تقریب رونمائی بھارت کے شہر گروگرام میں ہوئی جس میں میں انڈر 19 ورلڈ چیمپئنز کپتانوں یش دھل اور شفالی ورما نے شرکت کی، شائقین کو موقع فراہم کیا گیا ہے کہ وہ 27 اگست تک میسکوٹ کو نام دے سکتے ہیں۔

آئی سی سی کے ہیڈ آف ایونٹس کرس ٹیٹلی نے کہا کہ میسکوٹ کرکٹ میں انرجی،جوش، جذبے اور شائقین کے اس کھیل سے بے پناہ لگاؤ کی ترجمانی کرتے ہیں،مردوں اور خواتین کی نمائندگی سے صنفی برابری کو فروغ دینے کی کوشش ہوئی ہے۔

یہ بھی پڑھیں: ورلڈکپ؛ تاریخی ٹرافی تاج محل پہنچ گئی

دوسری جانب آئی سی سی ورلڈکپ ٹرافی نے کویت میں جلوہ دکھا دیا،اس موقع پر آئی سی سی کے ڈپٹی چیئرمین عمران خواجہ اور کویت کرکٹ کلب کے صدر حیدر فرمان بھی موجود تھے،تقریب میں مخصوص مہمانوں کو شرکت اور تصاویر بنوانے کی اجازت دی گئی تھی، ٹرافی کو کویت ٹاورز، پارلیمنٹ،الحمرا ٹاور اور ملک کی بلند ترین عمارت دی مال کا ٹور کروایا گیا۔

بحرین میں سجائی جانے والی تقریب کے بعد ٹرافی کو ورلڈ ٹریڈ سینٹر، شاہ فہد کازوے سمیت مختلف مقامات کا دورہ کروایا گیا،بحرین انٹرنیشنل سرکٹ پر عام شائقین کو ٹرافی دیکھنے کا موقع فراہم کیا،کرکٹ سے لگائو رکھنے والوں کی بڑی تعداد خاصی پْرجوش نظر آئی، شیخ خلیفہ بن حماد الخلیفہ اور آئی سی سی حکام بھی تقریبات کا حصہ بنے۔ یاد رہے کہ ورلڈکپ رواں برس 5 اکتوبر سے بھارت میں شروع ہوگا۔