مغربی کنارے میں کار پر فائرنگ سے اسرائیلی خاتون ہلاک ایک زخمی

ہفتے کے روز بھی فائرنگ کے ایک واقعے میں 2 اسرائیلی مارے گئے تھے، فوٹو: فائل

---

مغربی کنارے کے شہر ہیبرون کے قریب ایک کار پر فائرنگ کے نتیجے میں اسرائیلی خاتون ہلاک اور ایک شخص شدید زخمی ہو گیا۔

عالمی خبر رساں ادارے کے مطابق مغربی کنارے میں جس کار پر فائرنگ کی گئی اس میں 3 افراد سوار تھے۔ کار ایک شخص کی تھی جو ڈرائیو کر رہا تھا جب کہ ایک خاتون اور ان کی بیٹی نے لفٹ لی تھی۔

یہ کار جیسے ہی روٹ 60 پر پہنچی نامعلوم شخص نے اندھا دھند فائرنگ کردی۔ فائرنگ سے لفٹ لینے والی 40 سالہ خاتون ہلاک ہوگئیں جب کہ کار کے مالک شدید زخمی حالت میں زیر علاج ہیں۔

یہ خبر بھی پڑھیں : فلسطینی نوجوان کی فائرنگ سے 2 اسرائیلی ہلاک

اسرائیلی فوج نے فائرنگ کے واقعے کے بعد علاقے میں رکاوٹیں کھڑی کردیں اور ہیبرون شہر کو مکمل طور پر بند کردیا۔ اسرائیلی فوج مختلف علاقوں میں سرچ آپریشن کر رہی ہے۔

یاد رہے کہ ہفتے کے روز بھی مغربی کنارے کے شہر نابلس میں فائرنگ کے ایک اور واقعے میں دو اسرائیلی ہلاک ہوگئے تھے۔

رواں برس مغربی کنارے میں اسرائیلی فوج کے مظالم میں اضافہ دیکھا گیا ہے اور اب تک 200 سے زائد فلسطینیوں کو شہید کیا جا چکا ہے جب کہ 25 سے زائد اسرائیلی بھی مارے گئے ہیں اس طرح یہ سال دو دہائیوں میں سب سے زیادہ پُرتشدد ثابت ہو رہا ہے۔