علم ِفلکیات کی روشنی میں آپ کا یہ ہفتہ

28اگست تا 3 ستمبر 2023

---

برج حمل
سیارہ مریخ، 21 مارچ تا20اپریل
اس ہفتے اکثر سیارگان کم زور حالت میں ہیں۔ عطارد کام کاج کے امور میں راجع حالت میں عدالتی یا معاہدوں سے منسلکہ امور میں پیچیدگی لاسکتا ہے۔ خصوصاً 30 اور 31 اگست کی تاریخوں میں محتاط رہنے کی ضرورت ہے۔ ازدواجی امور میں بھی الجھنیں محسوس ہوتی ہیں۔

برج ثور
سیارہ زہرہ، 21اپریل تا 20 مئی
اچانک پرانے امراض سر اٹھاسکتے ہیں جنہیں زبانِ طب میں موروثی امراض کہا جاتا ہے جو کہ خاندانی امراض بھی کہلاتے ہیں۔ چودھویں کا چاند آپ کی امیدوں کے خانے میں روشن ہونے جارہا ہے۔ کسی دوست سے وابستہ پرانی امید بر آسکتی ہے۔

برج جوزا
سیارہ عطارد ، 21مئی تا 21 جون
آپ کا طالع کا مالک سیارہ چوتھے گھر میں راجع ہے، لیکن اسی جگہ چاند اور سورج کے درمیان بننے والی مقابلے کی نظر چودھویں کے چاند کو جنم دے رہی ہے۔ چاند آپ کی جیب کا نمائندہ ہے۔ گویا اس بات کا قوی امکان موجود ہے کہ آپ کی جیب اس ہفتے ضرور وزنی ہونے جارہی ہے۔

برج سرطان
سیارہ قمر ، 22جون تا 23 جولائی
آپ کے طالع کا مالک سیارہ یعنی چاند آپ کے نویں خانے میں نیپچون، زحل اور سورج سے ایک خاص تعلق بنانے جارہا ہے۔ چودھویں کا چاند مذہبی، بیرون ملک سفر اور اعلٰی تعلیم کے حوالے سے آپ کو خاصا پرجوش اور جذباتی بنا رہا ہے، لیکن وہیں وہ سوچنے اور قدرے غوروفکر کا رجحان بھی دے سکتا ہے۔

برج اسد
سیارہ شمس ، 24جولائی تا 23 اگست
آپ کا سیارہ ایک غیرموزوں یعنی آٹھویں گھر سے گزر رہا ہے۔ ایسے میں کسی میدان میں کودنے سے قبل اپنے آپ کو مضبوط ضرور کرلیں اور کوشش کریں کہ کسی خرابی کا اندیشہ ہو تو اس سے آپ کا تعلق نہ ہی ہو۔ بہرحال یہ چودھویں کا چاند آپ کو نہایت احتیاط سے گزارنے کا مشورہ ہے۔

برج سنبلہ
سیارہ عطارد ، 24 اگست تا 23 ستمبر
آپ کا سیارہ عطارد طالع میں الٹے قدموں چل رہا ہے۔ آپ کو اپنی ذات کو بہتر کرنے کا موقع ملے گا۔ چودھویں کا چاند ممکن ہے آپ کو کسی نئی ڈگر پر ڈال دے۔ آپ کے نویں یعنی مقدر کے خانے میں مشتری موجود ہے۔ اس بات کی گواہی مل رہی ہے کہ آپ کی خوش بختی کے دروازے کھلے ہیں۔

برج میزان
سیارہ زہرہ ، 24 ستمبر تا 23اکتوبر
آپ کا سیارہ زہرہ بارھویں گھر میں الٹے قدم چل رہا ہے اور یہاں سورج جو کہ آپ کے دوستوں کا نمائندہ ہے موجود ہے۔ دوستوں سے وابستہ امید پوری ہونا مشکل ہے بلکہ ممکن ہے دوست ہی مشکل میں ڈال دے۔ ایسے میں خفیہ مراسم احتیاط طلب ہوں گے۔

برج عقرب
سیارہ پلوٹو ، 24 اکتوبر تا 22 نومبر
ممکن ہے بیرون ملک سے منسلک افراد کو وہاں رہائش کے حصول میں مشکلات کا سامنا ہو، لیکن آپ کی توجہ اولاد اور محبت کے گرد طواف کرتی نظر آتی ہے۔ آپ کا سیارہ بالکل درست مقام پر نہیں ہے۔ محتاط رہیں سونے کی جگہ مسئلہ ہوسکتا ہے ۔

برج قوس
سیارہ مشتری ، 23 نومبرتا 22 دسمبر
آپ کا سیارہ مشتری چھٹے گھر میں راجع ہونے جارہا ہے۔ ایسے میں لگتا ہے گذشتہ چار ماہ میں یا تو آپ کے کچھ کام تعطل کے شکار ہوئے ہیں یا انہیں پھر سے کرنے کی ضرورت ہے۔ کیریئر میں اچھی خبر سن سکتے ہیں۔ رہائش گاہ میں کچھ تبدیلی کا امکان ہے۔

برج جدی
سیارہ زحل ، 23 دسمبر تا 20 جنوری
چودھویں کا چاند آپ کے تیسرے خانے میں روشن ہونے جارہا ہے۔ چاند آپ کے ازدواجی گھر کا نمائندہ ہے جب کہ نویں میں سورج اور عطارد موجود ہیں۔ بیرون ملک اور شادی کے بارے ہلچل ہوتی دکھائی دیتی ہے۔

برج دلو
سیارہ یورنیس ، 21 جنوری تا 19 فروری
آپ کی جیب میں چودھویں کا چاند چمکنے جارہا ہے اور سورج آٹھویں میں ہوگا۔ ایسے میں ازدواجی امور میں کچھ تلخی کا اندیشہ ہوسکتا ہے۔ اگر آپ نے حاضر دماغی سے کام نہ لیا تو بڑا مالی نقصان بھی ممکن ہے۔ چوری اور جیب کٹنے جیسا واقعہ ہوسکتا ہے۔

برج حوت
سیارہ نیپچون ، 20 فروری تا 20 مارچ
آپ کی خیالوں کی دنیا میں چار چاند لگنے والے ہیں۔ تصوراتی دنیا کی خودساختہ رنگینیاں آپ کو آپ کی جیب پر ہونے والے وار سے بے خبر رکھ سکتی ہیں محتاط رہیں۔ آپ کی جیب کا مالک سیارہ ایک خراب جگہ سے گزر رہا ہے۔ نقصان کا اندیشہ موجود ہے۔