اداروں میں تناؤ کے باعث مذاکراتی عمل میں مشکلات درپیش ہیں مولانا سمیع الحق

عمران خان اور طاہرالقادری احتجاج سے پہلے امن کے لیے کردار ادا کریں،مولانا سمیع الحق۔ فوٹو: فائل

---

طالبان کمیٹی کے سربراہ مولانا سمیع الحق نے کہا ہے کہ اداروں میں تناؤ کے باعث مذاکراتی عمل میں مشکلات درپیش ہیں تاہم حکومت اور طالبان نے ابھی مذاکرات ختم کرنے کا اعلان نہیں کیا۔

ایکسپریس نیوز کےمطابق لاہور میں ایک تقریب سے خطاب کرتے ہوئے مولانا سمیع الحق نے کہا کہ حکومت اور طالبان مذاکرات میں دونوں طرف سے رکاوٹیں ہیں اگر مذاکراتی کمیٹیاں جلد ملیں تو طالبان جنگ بندی میں توسیع پر راضی ہوسکتے ہیں۔ ان کا کہنا تھا کہ اداروں میں تناؤ کے باعث مذاکراتی عمل میں مشکلات ہیں تاہم حکومت اور طالبان نے ابھی مذاکرات ختم کرنے کا اعلان نہیں کیا اب طالبان بھی قوم کو خوشخبری سنانے کا موقع دیں۔

مولانا سمیع الحق نے کہا کہ وزیرستان میں آپریشن کا مشورہ دینےو الے ملک دشمن ہیں۔ عمران خان کے دھرنے سے متعلق ان کا کہنا تھا کہ نئے نئے مسائل بے وقت سر اٹھا لیتے ہیں، حکومتی کارکردگی پر احتجاج سیاسی جماعتوں کا حق ہے مگراس وقت احتجاج سے بڑا مسئلہ حکومت اور طالبان مذاکرات کو کامیاب بنانا ہے اس لیے عمران خان اور طاہرالقادری احتجاج سے پہلے امن کے لیے کردار ادا کریں۔