ملتان پولیس نے کارروائی کرکے 5 مبینہ دہشت گرد گرفتار کرلیے

دہشت گردوں کے قبضے سے بھاری مقدار میں جدید اسلحہ اور بارود برآمد کرلیا گیا ہے،پولیس۔فوٹو:ایکسپریس نیوز

---

پولیس نے سنٹرل جیل سمیت حساس مقامات کو نشانہ بنانے کا منصوبہ ناکام بناتے ہوئے 5 مبینہ دہشت گردوں کو گرفتار کرکے بھاری اسلحہ برآمد کرنے کا دعویٰ کیا ہے۔

ایکسپریس نیوز کے مطابق پولیس نے نیو ملتان کے علاقے کریم ٹاؤن میں ایک مکان پر چھاپہ مارا تو مکان میں موجود مبینہ دہشت گردوں نے پولیس پر فائرنگ کردی، پولیس نے جوابی فائرنگ کرتے ہوئے مکان کو گھیرے میں لے کر پانچوں دہشت گردوں کو گرفتارکرلیا۔

پولیس کا کہنا ہے کہ گرفتاردہشت گرد سینٹرل جیل ملتان سمیت حساس مقامات کو نشانہ بنانا چاہتے ہیں جبکہ ان کے قبضے سے سے بھاری مقدار میں جدید اسلحہ اور بارود بھی برآمد ہوا ہے، پولیس کی ابتدائی تحقیقات کے مطابق گرفتار دہشت گردوں میں سے ایک دہشت گرد ناصر کا تعلق مظفر گڑھ کی تحصیل کوٹ ادو سے ہے۔