ناظم آباد انڈر پاس میں سائن بورڈ گرنے سے ایک موٹرسائیکل سوار ہلاک 2 زخمی
ایک موٹر سائیکل پر شاہ فیصل کالونی کے رہائشی کاشف اورعامر جبکہ دوسری پر عزیز آباد کا رہائشی شاہد سوار تھا
ناظم آباد انڈر پاس میں سائن بورڈ گرنے سے 2 موٹر سائیکلوں پر سوار 3 زخمی ہوگئے جن میں سے ایک اسپتال میں دم توڑ گیا۔
ریسکیو حکام کا کہنا ہے کہ واقعہ ناظم آباد سے لیاقت آباد جانے والے انڈر پاس میں سائن بورڈ گرنے سے پیش آیا۔ ایس ایچ او ناظم آباد شاہد خان نے بتایا کہ ناظم آباد انڈر پاس محسن بھوپالی کے نام کا بورڈ گرنے کی وجہ سے وہاں سے گزرنے والے 3 افراد زخمی ہوئے۔
ایک موٹر سائیکل پر شاہ فیصل کالونی کے رہائشی 2 افراد کاشف اور عامر سوار تھے جبکہ دوسری موٹر سائیکل پر عزیز آباد کا رہائشی شاہد سوار تھا۔
ایدھی حکام کے مطابق زخمی 35 سالہ عامر دوران علاج زخموں کی تاب نہ لاتے ہوئے دم توڑ گیا۔
میئر کراچی نے واقعے کا نوٹس لے لیا
دریں اثنا میئر کراچی مرتضیٰ وہاب نے ناظم آباد انڈرپاس میں سائن بورڈ گرنے کے واقعے کا نوٹس لے لیا، جس کے بعد کے ایم سی حکام نے واقعے میں ملوث 3 نشے کے عادی افراد کو پکڑ کر پولیس کے حوالے کردیا۔
کے ایم سی حکام کا کہنا ہے کہ نشئی افراد بل بورڈ کے نٹ کھولنے میں ملوث ہیں جن کے خلاف قانونی کارروائی عمل میں لائی جائے گی۔