چندریان 3 نے چاند پر سلفر کی موجودگی کی تصدیق کردی
سلفر کے علاوہ ایلومینیئم، کیلشیئم، آئرن، کرومیئم اور ٹائٹینئم کی موجودگی کی بھی تصدیق کی گئی ہے
انڈیا کی جانب سے چاند پر بھیجے گئے روور نے جنوبی قطب پر سلفر سمیت دیگر عناصر کی موجودگی کی تصدیق کر دی۔
بھارت گزشتہ ہفتے چاند پر اپنا خلائی کرافٹ بھیج کر چاند پر اترنے والا چوتھا جبکہ جنوبی قطب پر پہنچنے والا پہلا ملک بن گیا ہے۔
بھارتی خلائی ادارے (آئی ایس آر او) کی جانب سے جاری ایک بیان میں بتایا گیا ہے کہ چندریان 3 روور نے اپنے لیزر اِنڈیوسڈ بریک ڈاؤن اسپیکٹرو اسکوپی آلے سے لی گئی پہلی پیمائش بھیجی۔
بیان میں کہا گیا کہ موقع سے لی گئی پیمائشوں سے جنوبی قطب میں سلفر کی موجودگی کی تصدیق ہوتی ہے۔
ادارے نے مزید بتایا کہ اسپیکٹرو گرافک تجزیے نے ایلومینیئم، کیلشیئم، آئرن، کرومیئم اور ٹائٹینئم کی موجودگی کے ساتھ مینگنیز، سیلیکون اور آکسیجن کی موجودگی کی تصدیق بھی کی۔