بھارت میں مسلمان سابق رکن پارلیمنٹ درخت چرانے کے الزام میں گرفتار

سابق رکن پارلیمنٹ پر کھیتوں میں آلودہ پانی چھوڑنے کا الزام بھی لگایا گیا ہے:فوٹو:ویب ڈیسک

---

بھارت میں درختوں کی چوری کے الزام میں مسلمان سابق رکن پارلیمنٹ کو گرفتار کرلیا گیا۔

بھارتی میڈیا کے مطابق اترپردیش کے شہر مظفرنگرسے سماج وادی پارٹی کے سابق رکن پارلیمنٹ قادر رانا کو پڑوسی کی زمین سے درخت چرانے کے الزام میں گرفتار کیا گیا ہے جبکہ ان پر پڑوسی کی زمین پر قبضے کا مقدمہ بھی درج کیا گیا ہے۔

پولیس حکام کا کہنا ہے کہ قادر رانا کی پڑوسی انیتا گپتا کی جانب سے دائر درخواست میں ان پر انیتا کی زمین پر موجود چنار اور یوکلپٹس کے 50 سے زائد درختوں کو کاٹنے اور چوری کرنے کے الزامات لگائے گئے ہیں۔ قادر رانا پر اپنی فیکٹری سے آلودہ پانی کھیتوں میں چھوڑنے کا الزام بھی عائد کیا گیا ہے۔ پولیس مزید تحقیقات کررہی ہے۔

مظفرنگر میں گزشتہ ماہ سے مسلمانوں کے گھروں اور دکانوں پر حملے کیے جارہے ہیں۔ ہندو انتہا پسندوں نے مسلمانوں کو گھر خالی کرنے کے لیے دھمکی آمیز پوسٹر لگائے ہیں اور گھروں کو چھوڑ کر نہ جانے کی صورت میں جان سے مارنے سمیت سنگین نتائج کی دھمکیاں دی ہیں۔ ہندوانتہاپسندوں کی حمایتی پولیس مسلمانوں پر مظالم اور دھمکیوں پر ایکشن لینے کے بجائے خاموش تماشائی کا کردار ادا کر رہی ہے۔