ایشیاکپ بارش کے باعث پاک بھارت میچ بے نتیجہ ختم
دونوں ٹیموں کو ایک ایک پوائنٹ دے دیا گیا
ایشیا کپ میں بارش کے باعث پاک بھارت میچ بے نتیجہ ختم، دونوں ٹیموں کو ایک ایک پوائنٹ مل گیا۔
سری لنکا کے شہر کینڈی کے پالی کیلے اسٹیڈیم میں ایشیا کپ کے تیسرے میچ میں بھارت نے پاکستان کو جیت کیلئے 267 رنز کا ہدف تھا تاہم بارش کے باعث میچ تاخیر کا شکار ہوگیا اور پاکستان اپنی اننگز شروع ہی نہیں کرسکا۔
دونوں ٹیموں کو ایک ایک پوائنٹ دیکر میچ کو ڈرا کردیا گیا۔ پاکستان ٹورنامنٹ کے اگلے راؤنڈ کے لیے کوالیفائی کرنے والی پہلی ٹیم بن گئی۔ پاکستان گروپ اے سے سپر فور راؤنڈ میں پہنچ گیا ہے۔
قبل ازیں بھارتی کرکٹ ٹیم کے کپتان روہت شرما نے ٹاس جیت کر پہلے بیٹنگ کا فیصلہ کیا تھا، پاکستانی پیسرز نے شاندار بالنگ کرتے ہوئے بھارت کا ٹاپ آرڈر اڑا کر رکھ دیا۔ بھارت کی ٹیم 50 اوورز بھی پورے نہ کھیل سکی اور 48.5 اوورز میں 266 رنز بناکر ڈھیر ہوگئی۔
بھارت کی پہلی وکٹ 15 رنز پر گری جب کہ 66 رنز کے مجموعی اسکور تک بھارت کے چار کھلاڑی آؤٹ ہوچکے تھے۔ بھارتی اوپنر روہت شرما 11، ویرات کوہلی 4، شیرس ایر 14 اور شبمن گِل محض 10 رنز بناکر پویلین لوٹ گئے۔
میچ کے آغاز میں پاکستانی بولرز بھارتی بلے بازوں پر حاوی رہے تاہم بعد میں آنے والے ایشان کشان اور ہارڈیک پانڈیا کریز پر جم گئے اور اسکور کو کافی آگے لے گئے۔
بھارت کی پانچویں وکٹ 204 کے مجموعی اسکور پر گری جب ایشان کشان 81 گیندوں پر 82 رنز کی اننگز کھیل کر آؤٹ ہوئے۔ ہارڈیک پانڈیا 239 کے مجموعی اسکور پر 87 رنز بناکر پویلین لوٹ گئے، انہوں نے 90 گیندوں کا سامنا کیا۔
ایشان کشان اور ہارڈیک پانڈیا کےجاتے ہی ایک بار پھر بھارت کی وکٹیں تیزی سے گرنے لگیں اور رویندرا جدیجا 14، شردل ٹھاکر 3، کلدیپ یادیو 4 اور جسپریت بمراہ 16 رنز بناکر آؤٹ ہوگئے۔
پاکستان کی جانب سے شاہین شاہ آفریدی نے 4، حارث رؤف اور نسیم شاہ نے 3،3 وکٹیں حاصل کیں۔ شاہین آفریدی نے ویرات کوہلی، روہت شرما، ہارڈیک پانڈیا اور رویندرا جدیجا کو جبکہ حارث رؤف نے شبمن گِل، شیرس ایر، ایشان کشان کو پویلین بھیجا۔ نسیم شاہ نے شردل ٹھاکر، کلدیپ یادیو اور جسپریت بمراہ کی وکٹ حاصل کی۔
قبل ازیں بھارتی کپتان روہت شرما نے ٹاس جیتنے کے بعد گفتگو کرتے ہوئے کہا تھا کہ موسم سے فرق نہیں پڑتا کوشش ہوگی پاکستان کے خلاف بڑا ٹارگٹ سیٹ کریں۔
اس موقع پر قومی کرکٹ ٹیم کے کپتان بابراعظم کا کہنا تھا کہ ٹاس جیتتے تو پہلے بیٹنگ کرنے کا ہی فیصلہ کرتے تاہم ٹاس ہمارے ہاتھ میں نہیں، کوشش ہوگی بھارت کو ابتداء سے ہی مشکل میں ڈالیں۔
پاکستان اسکواڈ:
کپتان بابراعظم، فخر زمان، امام الحق، سلمان علی آغا، محمد رضوان، شاداب خان، محمد نواز، نسیم شاہ، شاہین شاہ آفریدی اور حارث رؤف شامل ہیں۔
بھارت کا اسکواڈ:
کپتان روہت شرما، شبمن گِل، ویرات کوہلی، ایشان کشن، شیرس ایر، ہاردک پانڈیا، رویندرا جڈیجا، شاردل ٹھاکر، کلدیپ یادیو، جسپریت بمراہ اور محمد سراج شامل ہیں۔