وزیراعظم ایران کے صدرحسن روحانی کی دعوت پر تہران پہنچ گئے

پاکستان اور ایران میں نئی حکومتوں کے قیام کے بعد اعلیٰ قیادت کی سطح پر یہ پہلا سرکاری دورہ ہے فوٹو: فائل

---

وزیر اعظم نوازشریف ایران کے صدرحسن روحانی کی دعوت پر 2 روزہ سرکاری دورے پر تہران پہنچ گئے۔

وزیراعظم کے ہمراہ مشیر خارجہ سرتاج عزیز، معاون خصوصی طارق فاطمی، وزیر خزانہ اسحاق ڈار، وزیر پٹرولیم و قدرتی وسائل شاہد خاقان عباسی اور وزیراعلیٰ بلوچستان ڈاکٹر عبدالمالک بلوچ موجود ہیں۔ دورے کے دوران وزیراعظم نوازشریف ایرانی صدرحسن روحانی اور روحانی پیشوا آیت اللہ خامنہ ای سے ملاقاتیں کریں گے۔ جس میں سرحدی صورت حال، دوطرفہ تعلقات اورعلاقائی وبین الاقوامی ترقی کے باہمی مفاد کے مواقع کا جائزہ لیاجائے گا۔ اس موقع پر متعدد شعبوں میں کئی مفاہمتی معاہدے طے پانے کے علاوہ پاک ایران گیس پائپ لائن منصوبے کے مستقبل کا بھی فیصلہ ہوگا۔

واضح رہے کہ پاکستان اور ایران میں نئی حکومتوں کے قیام کے بعد اعلیٰ قیادت کی سطح پر یہ پہلا سرکاری دورہ ہے۔