کراچی دبئی سے بھیجے گئے کنٹینر سے شراب کی ہزاروں بوتلیں برآمد

انٹرنیشنل ٹرمینل پر کارروائی کے دوران شراب کی بوتلیں برآمد کی گئیں

---

اینٹی نارکوٹکس فورس نے دبئی سے بھیجے گئے کنٹینر سے شراب کی ہزاروں بوتلیں برآمد کرلیں۔

ترجمان اے این ایف کے مطابق منشیات اسمگلنگ کے خلاف ملک بھر میں کریک ڈاؤن جاری ہے، اس دوران بھاری مقدار میں منشیات برآمد کرکے 5 ملزمان کو گرفتار کرلیا گیا ہے۔

کراچی انٹرنیشنل کنٹینر ٹرمینل پر اے این ایف کی بڑی کارروائی میں دبئی سے بھیجے گئے کنٹینر سے بڑی تعداد میں شراب کی بوتلیں برآمد کرلی گئیں۔ غیر ملکی شراب کی 8520 بوتلیں کراچی کی نجی کمپنی کے لیے بک کروائی گئیں تھیں۔

اے این ایف نے موٹروے ٹول پلازہ اسلام آباد کے قریب 2 کارروائیوں میں مسافر بس میں سوار 2 ملزمان سے مجموعی طور پر 2 کلو چرس اور 480 گرام آئس برآمد کرلی، علاوہ ازیں ٹوبہ ٹیک سنگھ کے رہائشی موٹر سائیکل سوار سے 6 پیکٹ چرس برآمد کرلی۔ برآمدہ چرس کا مجموعی وزن 7 کلو 200 گرام ہے ۔

اُدھر یونیورسٹی روڈ پشاور پر ملزم سے 464 نشہ آور (ایکسٹیسی) گولیاں برآمد کرلی گئیں۔ ہنگو کے رہائشی گرفتار ملزم نے یونیورسٹی کے طلبہ کو منشیات فروخت کرنے کا اعتراف کرلیا۔

علاوہ ازیں باچا خان انٹرنیشنل ائرپورٹ پر مسافر کے پیٹ سے 86 ہیروئن بھرے کیپسول برآمد کرلیے۔ خیبر کا رہائشی ملزم پرواز نمبر EK-637 کے ذریعے دبئی کے لیے روانہ ہو رہا تھا۔ دریں اثنا خیبر کے علاقے زخہ خیل میں 2 کاروائیوں میں اسمگلنگ کے لیے چھپائی گئی 20 کلو چرس برآمد کرلی گئی۔

اے این ایف نے تمام کارروائیوں میں گرفتار ملزمان کے خلاف انسدادِمنشیات ایکٹ کے تحت مقدمات درج کر کے مزید تحقیقات کا آغاز کر دیا گیا ہے۔