دفتر کی چھت کا پلستر جھڑنے سے ایس ایس پی اے وی ایل سی اور ڈی ایس پی زخمی
ایس ایس پی اے وی ایل سی عبدالکریم شیرازی اور ڈی ایس پی ایڈمن کمبو خان کو اسپتال منتقل کردیا گیا
ایس ایس پی اے وی ایل سی کے کمرے کی چھت کا پلستر گرگیا جس کے سبب ایس ایس پی اور ڈی ایس پی ایڈمن زخمی ہوگئے۔
ایکسپریس کے مطابق آرٹلری میدان تھانے سے متصل اینٹی وہیکل لفٹنگ سیل کے دفترمیں ایس ایس پی اے وی ایل سی کے کمرے کی چھت کا پلستر جھڑنے سے ایس ایس پی اے وی ایل سی عبدالکریم شیرازی اورڈی ایس پی ایڈمن کمبو خان زخمی ہوگئے جنہیں فوری طورپر اسٹیڈیم روڈ پر واقع نجی اسپتال منتقل کردیا گیا۔
پولیس حکام کے مطابق ایس ایس پی کے کمرے کی چھت کا پلستر گرنے سے ایس ایس پی اے وی ایل کے سراورجسم کے مختلف حصوں پر چوٹیں آئی ہیں اور ایس ایس پی کے نجی اسپتال میں مختلف ٹیسٹ کروائے جا رہے ہیں، پلسترگرنے سے ایس ایس پی کے کمرے میں موجود فرنیچر اور دیگر سامان کو بھی نقصان پہنچا ہے۔
پولیس حکام کے مطابق عمارت خستہ حال ہونے کے باعث حادثہ پیش آیا۔ ذرائع کا کہنا ہے کہ کچھ عرصے قبل بھی اے وی ایل سی میں تعینات افسر نے چھت کی مرمت کرائی تھی۔
ڈی آئی جی سی آئی اے شرجیل کھرل کے مطابق ایس ایس پی اور ڈی ایس پی کی حالت خطرے سے باہر ہے، چھت گرنے کا واقعہ حادثاتی طور پر پیش آیا ہے۔