غلاظت لگی سیٹوں پر نہ بیٹھنے والے 2 مسافروں کو ہوائی جہاز سے اتار دیا گیا
ایئر کینیڈا کے عملے نے پرفیوم سے بدبو کو ختم کرنے کی کوشش کی مگر بدبو بدستور قائم رہی
امریکی شہر سیئٹل سے کینیڈا کے شہر مونٹریال جانے والی ایئر کینیڈا کی پرواز کے دو مسافروں کو محض اس بات پر طیارے سے اتار دیا گیا کیونکہ انہوں نے اُلٹی کی غلاظت لگی سیٹوں پر بیٹھنے سے انکار کردیا تھا۔
میڈیا رپورٹس کے مطابق واقعے کو شیئر کرنے والے اسی جہاز کی مسافر سوزن بینسن ہیں جو دونوں مسافروں کی سیٹوں کے قریب براجمان تھیں۔
وائرل ہونے والی فیس بک پوسٹ میں سوزن نے بتایا کہ دونوں مسافروں کو طیارے سے اس وقت لے جایا گیا جب پائلٹ نے ان پر فلائٹ اٹینڈنٹ کے ساتھ بدتمیزی کا الزام لگایا۔
سوزن نے واقعے کی تفصیلات سے آگاہ کرتے ہوئے بتایا کہ بظاہر پچھلی پرواز پر کسی نے سیٹ پر قے کی تھی۔ ایئر کینیڈا نے دوسرے چکر میں مسافروں کے سوار ہونے سے پہلے فوری صفائی کی کوشش کی لیکن واضح طور پر مکمل صفائی نہیں کر سکی۔ سیٹ بیلٹ اور سیٹ اب بھی واضح طور پر اُلٹی سے تَر تھے اور سیٹوں کے ارد گرد الٹی کی چھینٹے موجود تھے۔ پرفیوم سے بدبو کو ختم کرنے کی کوشش کے باوجود بدبو اب بھی نمایاں تھی۔