160 کلو وزنی خاتون بستر سے گر گئی اٹھانے کیلئے ریسکیو ٹیم طلب

بھارت میں ایک عجیب و غریب واقعہ میں 160 کلو وزنی 62 سالہ خاتون اپنے بستر سے گر گئی جس کو اٹھانے کیلئے ریسکیو اہلکاروں کو طلب کرنا پڑا۔

بھارتی میڈیا کے مطابق مہاراشٹر کے ضلع تھانے میں ریجنل ڈیزاسٹر مینجمنٹ سیل کو اطلاع ملی تھی کہ ایک خاتون اپنے اپارٹمنٹ میں بستر سے گر گئی ہیں جنہیں انکے اہلخانہ اٹھانے سے قاصر ہیں اور فوری طور پر مدد کی ضرورت ہے۔




معلومات کے مطابق خاتون اپنے بستر پر کروٹ بدلتے ہوئے گریں اور چونکہ انکا وزن بہت زیادہ تھا اس لیے گھر والے کوشش کے باوجود نہیں اٹھا سکے۔ کوئی دوسرا راستہ نہ ملنے پر انہوں نے ریجنل ڈیزاسٹر مینجمنٹ سیل کو واقعہ کی اطلاع دی۔

کارپوریشن کے ڈیزاسٹر مینجمنٹ سیل کے سربراہ یاسین تڈوی نے بتایا کہ مذکورہ خاتون خراب صحت کی وجہ سے چلنے پھرنے سے قاصر ہیں۔ اہلخانہ کے رابطہ کرنے پر ریسکیو ٹیم فوری طور پر فلیٹ پر پہنچی جس نے خاتون کو اٹھا کر واپس بستر پر لٹا دیا۔ گرنے سے خاتون کو کوئی چوٹ نہیں آئی۔