جی20 اجلاس جوبائیڈن کی بھارت آمد مودی نے صحافیوں کو کوریج سے روک دیا
امریکی صدر کی ملاقاتوں کی میڈیا کوریج کو یقینی بنانے کیلئے ہر ممکن کوشش کر رہے ہیں، وائٹ ہاؤس ترجمان
بھارتی وزیر اعظم نریندر مودی نے نئی دہلی میں جی20 سربراہی اجلاس کیلئے آئے امریکی صدر جو بائیڈن کا پرتپاک استقبال کیا تاہم میڈیا نمائندوں کو ملاقات کی کوریج سے روک دیا۔
عالمی میڈیا رپورٹس کے مطابق G-20 جیسے اہم سربراہی اجلاسوں کے موقع پر رہنماؤں کی ملاقات تک میڈیا کی رسائی کو ہمیشہ سختی سے کنٹرول کیا جاتا ہے تاہم ایسا شاذ و نادر ہی ہوتا ہے کہ اس پر مکمل طور پر پابندی عائد کردی جائے۔
بھارتی حکومت کی جانب سے یہ فیصلہ جون میں نریندر مودی کے سرکاری دورہ امریکا کے بعد سامنے آیا ہے جہاں انہوں نے واشنگٹن میں امریکی نامہ نگاروں کی جانب سے ایک سوال لینے پر رضامندی ظاہر کی تھی۔ جس میں وال اسٹریٹ کی رپورٹر سبرینا صدیقی نے وزیر اعظم سے بھارت میں مسلمانوں پر جبر و تشدد اور انسانی حقوق کیخلاف وزریوں سے متعلق سوال کیا تھا۔
وائٹ ہاؤس کی ترجمان کیرن جین پیئر نے امریکی صدر کو بھارت لے جانے والے طیارے میں سوار صحافیوں سے گفتگو میں کہا کہ آزاد صحافت امریکی جمہوریت کا ستون ہے اور وہ جوبائیڈن کی ملاقات تک میڈیا نمائندوں کی رسائی کو یقینی بنانے کے لیے ہر ممکن کوشش کر رہے ہیں۔
دوسری جانب امریکی قومی سلامتی کے مشیر جیک سلیوان نے ایئر فورس ون کے بورڈ پر کہا کہ ہم صحافیوں کی صدر کے معمولات تک رسائی حاصل کرنے اور اسے یقینی بنانے کے لیے سخت محنت کرتے ہیں۔
تاہم طیارے کی بھارت میں لینڈنگ کے بعد صدر جوبائیڈن کو بھارتی وزیر اعظم کی رہائش گاہ کی طرف روانہ کیا گیا جبکہ ان کے ساتھ سفر کرنے والے صحافیوں کو جانے سے روک دیا گیا۔