کراچی میں فائرنگ سے 7 سالہ بچی جاں بحق

مقتولہ مریم کی یادگار فوٹو

---

سخی حسن بفرزون کے علاقے میں 7سالہ بچی مریم ثاقب فائرنگ سے جاں بحق ہوگئی۔

تیموریہ پولیس نے واقعے کے عینی شاہد مریم کے والد ثاقب کا بیان ریکارڈ کرلیا۔

ایس ایس پی سینٹرل فیصل عبد اللہ نے بتایا کہ ثاقب گاڑی میں اپنی بیٹی کو اسکول چھوڑنے جارہے تھے، کہ روڈ کی دوسری جانب سے گولی آکر مریم کے سرپر لگی۔

والد نے پولیس کو بیان دیا کہ روڈ کی دوسری جانب ملزمان فائرنگ کے بعد بھاگتے ہوئے دیکھے گئے تھے۔

ایس ایس پی فیصل عبداللہ چاچڑ کا کہنا ہے کہ ممکنہ طورپرنامعلوم افراد کے درمیان فائرنگ کا تبادلہ ہورہا تھا اور 7 سالہ مریم فائرنگ کی زد میں آئی۔ پولیس نے جائے وقوعہ اور اطراف کی سی سی ٹی وی فوٹیجز جمع کر لی ہیں اور گولیوں کے خول بھی ڈھونڈ لیے ہیں۔

ایس ایس پی سینٹرل فیصل عبداللہ چاچڑ نے واقعے پر 4رکنی تحقیقاتی ٹیم تشکیل دیدی جس کا نوٹیفکیشن جاری کردیا گیا۔

بعد ازاں مریم کو محمد شاہ قبرستان میں سپرد خاک کردیا گیا، اہل خانہ نے حکام سے مطالبہ کیا کہ وہ ملوث افراد کیخلاف کارروائی کریں تاکہ دوسرے بچے محفوظ رہ سکیں۔

معصوم بچی کے جنازے میں علاقہ مکینوں کی بڑی تعداد نے شرکت کی۔