کھلاڑیوں کے ڈریسنگ روم کی خبریں میڈیا میں لیک ہونے پر ثناء میر بھی بول اُٹھیں

اس سے زیادہ کوئی چیز ٹیم کو نقصان نہیں پہنچاسکتی، سابق کپتان

اس سے زیادہ کوئی چیز ٹیم کو نقصان نہیں پہنچاسکتی، سابق کپتان (فوٹو: ایکسپریس ویب)

قومی ویمنز کرکٹ ٹیم کی سابق کپتان اور کمنٹیٹر ثناء میر ڈریسنگ روم میں کھلاڑیوں کے درمیان جھگڑے کی خبریں منظر عام پر آنے پر بھڑک اٹھیں۔

سماجی رابطے کی سائٹ ٹوئٹر (ایکس) پر ٹوئٹ کرتے ہوئے سابق ویمنز کرکٹ ٹیم کی کپتان ثناء میر نے کہا کہ ڈریسنگ روم کی خبریں جو میڈیا تک پہنچاتا ہے اسکو شرم آنی چاہیے، اس سے زیادہ کوئی چیز ٹیم کو نقصان نہیں پہنچاسکتی۔

انہوں نے فاسٹ بولر نسیم شاہ کی انجری کے حوالے سے خبر بھی شیئر کرتے ہوئے لکھا کہ ورلڈکپ سے یہ پاکستان کیلئے بڑا نقصان ہے۔

مزید پڑھیں: ایشیاکپ؛ قومی ٹیم کے ڈریسنگ روم میں جھگڑے کی افواہیں جھوٹ نکلیں

قبل ازیں گزشتہ روز میڈیا رپورٹس میں دعویٰ کیا گیا تھا کہ ایشیاکپ کے سپر فور مرحلے میں سری لنکا کے خلاف میچ میں شکست کے بعد پاکستان کے کپتان بابر اعظم اور فاسٹ بولر شاہین شاہ آفریدی کے درمیان ڈریسنگ روم میں تلخ کلامی ہوئی تھی۔


مزید پڑھیں: نسیم شاہ کے ورلڈکپ سے باہر ہونے کا خدشہ

تاہم اس حوالے سے ایکسپریس نیوز کے نمائندے نے رابطہ کیا تو ٹیم کے ایک سینئیر کھلاڑی نے رپورٹس کی تردید کرتے ہوئے کہا کہ ٹیم کی واحد توجہ کرکٹ پر ہے اور ہمیں ناقدین کی فکر نہیں ہے، میچ ہارنے سے ہمارے ناقدین کو اپنی رائے دینے کا موقع ملا ہے لیکن یہ محض منفی قیاس آرائیاں ہیں۔

مزید پڑھیں: نسیم شاہ ورلڈکپ کے ابتدائی میچز نہیں کھیل سکیں گے، بابراعظم کا عندیہ

دوسری جانب کرک انفو نے اپنی رپورٹ میں دعویٰ کیا تھا کہ انجری کے باعث فاسٹ بولر نسیم شاہ کے بھارت میں شیڈول ورلڈکپ سے باہر ہونے کا خدشہ ہے جبکہ وہ پاکستان سپر لیگ (پی ایس ایل) کے اگلے ایڈیشن سے بھی محروم ہوسکتے ہیں۔

Load Next Story