ایران میں معروف فٹبالر کرسٹیانو رونالڈو کا شاندار استقبال

ایرانی فٹبال کلب کا سعودی فٹبال کلب ٹیم سے میچ آج تہران میں ہوگا

ویب ڈیسک September 19, 2023

ایرانی فٹبال کلب کا سعودی فٹبال کلب ٹیم سے میچ آج تہران میں ہوگا، فوٹو: فائل

سعودی فٹ بال کلب النصر کی ٹیم اے ایف سی چیمپئنز لیگ میں شرکت کے لیے ایران پہنچ گئی جہاں کرسٹیانو رونالڈو کے مداحوں نے ٹیم کو قافلے کی صورت میں ایئرپورٹ سے ہوٹل پہنچایا۔

عالمی خبر رساں ادارے کے مطابق لیجنڈ فٹبالر کرسٹیانو رونالڈو کے مداح دنیا بھر میں پھیلے ہوئے ہیں۔ پرتگال کے شہرۂ آفاق فٹبالر نے حال ہی میں سعودی فٹبال کلب النصر میں شمولیت اختیار کی ہے اور سعودی عرب میں ہی مقیم تھے۔

سعودی فٹبال کلب النصر کی ٹیم اے ایف سی چیمپئنز لیگ میں حصہ لے رہی ہے اور اس سلسلے میں رونالڈو اپنی ٹیم کے ہمراہ تیہران پہنچے۔ اپنے پسندیدہ فٹبالر کی ایک جھلک دیکھنے کے لیے سیکڑوں ایرانی ایئرپورٹ پہنچ گئے۔

عاجل 🔴

استقبال تاريخي كبير من الجماهير الإيرانية لحافلة نادي النصر والأسطورة " كرستيانو رونالدو " لدى وصولهم إيران .

-

pic.twitter.com/ScKPxctOGj

- خبر عاجل (@AJELNEWS24) September 18, 2023

اس موقع پر مداحوں نے النصر کی ٹی شرٹ پہنی ہوئی تھیں اور کرسٹیانو رونالڈو کی تصویریں اٹھا رکھی تھیں اور شدید نعرے بازی کر رہے تھے۔ مداحوں نے فٹبالر پر پھول بھی نچھاور کیے۔

سیکڑوں کی تعداد میں مداحوں نے قافلے کی صورت میں اپنے پسندیدہ فٹبالر کو ایئرپورٹ سے ہوٹل پہنچایا۔ راستوں کو ہورڈنگز اور بینرز لگا کر سجایا گیا تھا۔ کھلاڑیوں کی بسوں پر گل پاشی بھی کی گئی۔

یاد رہے کہ اے ایف سی چیمپئنز لیگ 2023-2024 کا آغاز منگل کی شام آزادی اسٹیڈیم میں ہوگا جہاں سعودی عرب کی النصر کا ایرانی کلب ٹیم پرسیپولیس کا میچ ہوگا۔