رونے کی ویڈیو وائرل ہونے پر کمسن مداح کی رونالڈو سے ملاقات کرادی گئی
پرتگالی اسٹار فٹبالر نے بچے کو گلے لگایا اور شرٹ بھی تحفے میں دی
پرتگال کے اسٹار فٹبالر رونالڈو نے اپنے کم عمر ایرانی مداح کی ملاقات کی خواہش پوری کردی۔
سعودی النصر کلب کے لیجنڈری فٹبالر کرسٹیانو رونالڈو پیر کو ایرانی دارالحکومت تہران پہنچے تھے جہاں انکا ہزاروں مداحوں نے والہانہ استقبال کیا۔ ایئرپورٹ سے روانگی کے دوران لوگ دیوانہ وار انکی بس کے ساتھ دوڑتے رہے جبکہ ہوٹل کے باہر بھی لوگوں کی بڑی تعداد اسٹار فٹبالر کی ایک جھلک دیکھنے کیلئے موجود رہی۔
مزید پڑھیں: سعودی قومی دن پر کرسٹیانو رونالڈو عرب ثقافتی رنگ میں ڈھل گئے
ایسے میں ایک کمسن مداح کو پرتگالی اسٹار سے ذاتی طور پر انکے ہوٹل کے کمرے میں ملاقات کا موقع مل گیا۔ ہوا کچھ یوں کہ رونالڈو کے کمسن مداح ایڈریان کی تہران کے اسپیناس پیلس ہوٹل کے باہر رونالڈو کو نہ دیکھ پانے کی وجہ سے رونے کی ویڈیو سوشل میڈیا پر وائرل ہوئی تھی۔
یہ بھی پڑھیں: ایران میں معروف فٹبالر کرسٹیانو رونالڈو کا شاندار استقبال
ویڈیو وائرل ہونے کے بعد النصر کلب کے عہدیداروں نے ننھے مداح کی خواہش کو پورا کرتے ہوئے اسکی ہوٹل میں رونالڈو کے ساتھ ملاقات کرانے کا فیصلہ کیا۔ بچے کو ہوٹل میں رونالڈو کے کمرے میں لے جایا گیا جہاں اسٹار فٹبالر نے ایڈریان کو خوشگوار موڈ میں گلے لگایا اور اسکے ساتھ بات چیت کی۔
رونالڈو نے اُسے ایک شرٹ تحفے میں دی اور تصویر بھی کھنچوائی۔ کمسن مداح جس نے النصر کی قمیض پہن رکھی تھی رونالڈو کے مشہور "Siu" جشن کی نقل کی جس پر رونالڈو ہنس پڑے۔