مہنگائی کے خلاف احتجاج سپریم کورٹ کے سینئر وکیل پر مقدمہ درج
اختر حسین جوڈیشل کمیشن کے ممبر بھی ہیں، ایف آئی آر واپس لے کر افسران کیخلاف کارروائی کی جائے، پاکستان بار کونسل
راولپنڈی میں مہنگائی کے خلاف احتجاج کرنے پر سینئر وکیل ایڈوکیٹ اختر حسین کے خلاف مقدمہ درج کرلیا گیا، جس کی پاکستان بار کونسل نے سخت الفاظ میں مذمت کی ہے۔
پاکستان بار کونسل کی جانب سے جاری مذمتی اعلامیے میں بتایا گیا ہے کہ ایڈوکیٹ اختر حسین سپریم کورٹ کے سینئر وکیل ہیں جنہوں نے راولپنڈی میں مہنگائی کے خلاف پُرامن احتجاج کیا تو اُن کے خلاف ایف آئی آر درج کرلی گئی۔
اعلامیے کے مطابق ایڈوکیٹ اختر حسین سپریم کورٹ کے سینئر وکیل کے ساتھ جوڈیشل کمیشن کے ممبر بھی ہیں جن کے خلاف مقدمہ اندراج کی سخت مذمت کرتے ہیں کیونکہ آئین کی روح سے ہر شہری کو پُرامن احتجاج و اظہار رائے کی آزادی حاصل ہے۔
پاکستان بار نے کہا کہ ایڈوکیٹ اختر حسین کے خلاف درج ہونے والی غیر قانونی ایف آئی آر فوری واپس لی جائے اور جن افسران نے اختیارات کا غلط استعمال کیا اُن کے خلاف کارروائی کی جائے۔