کراچی میں رکشا ڈرائیور جبری ٹریفک چالانوں پر رو پڑا

صبح سے 150 روپے کمائے اور 520 روپے کا چالان کر دیا، رکشہ ڈرائیور

---

کراچی پریس کلب کے سامنے رکشا ڈرائیور ٹریفک پولیس کے جبری چالان کے خلاف احتجاج کرتے ہوئے رو پڑا۔

رکشا رجسٹریشن نمبر ڈی 16966 کے ڈرائیور کا کہنا تھا کہ صدر میں ٹریفک پولیس کی جانب سے اس کا دوبارہ سے 520 کا چالان کیا گیا جبکہ ایک روز قبل ہی اس نے چالان جمع کرایا ہے۔

اس نے کہا کہ ہفتے میں 2 سے 3 بار اس کا چالان کیا جاتا ہے ، صبح سے 150 روپے کمائے ہیں آدھا دن گزر گیا ہے بتاؤ میرا دوبارہ سے 520 روپے کا چالان کر دیا ہے ، کبھی پرمٹ تو کبھی فٹنس کے نام پر چالان کیا جا رہا ہے ، ڈرائیور کا کہنا تھا کہ کرایے کا گھر ہے۔

مہنگا پیٹرول اور بلاوجہ کے چالان نے رکشہ ڈرائیور کا پریشان کر دیا یہ زارو قطار روتا ہوا رکشہ ڈرائیور ٹریفک پولیس کے خلاف کراچی پریس کلب پر احتجاج کر رہا ہے pic.twitter.com/UlmgbKRSCX

— Hafiza Bano (@HafizBano) September 20, 2023

اس کا کہنا تھا کہ بجلی اور گیس کا بل ہے اگر چالان میں ہی دن ساری کمائی جمع کرا دونگا تو بچوں کو کہاں سے کھلاؤں گا ٹریفک پولیس والے مجھ پر رحم کھاؤ ۔

ایس ایس پی ٹریفک نے چالان ادا کر دیا

ایس ایس پی ٹریفک ڈسٹرکٹ سٹی آصف علی جکھرانی نے پریس کلب کے باہر رکشا ڈرائیور کی وائرل ہونے والی ویڈیو کا نوٹس لیتے ہوئے رکشا ڈرائیور سے رابطہ کر کے اسے اپنے دفتر بلایا اور اس سے معلومات حاصل کی۔

ایس ایس پی ٹریفک سٹی نے رکشا ڈرائیور کی مالی حالات کو دیکھتے ہوئے چالان ادا کر دیا جبکہ رکشا ڈرائیور کو ٹریفک پولیس کے ساتھ تعاون اور ٹریفک قوانین کی پاسداری کرنے کی بھی ہدایت کی۔