روکنے کے باوجود دوران طواف لوگ با پردہ اہلیہ کی ویڈیو بناتے رہے شاہد آفریدی

ویڈیوز بنانے والوں سے موبائل چھینا تاہم بعد میں معذرت کی ، شاہد آفریدی

ویب ڈیسک September 21, 2023

ملک کے دور دراز علاقوں میں تعلیم نہ پہنچ سکی وائے فائے پہنچ گیا، شاہد آفریدی:فوٹو:فائل

سابق کرکٹر شاہد آفریدی نے کہا ہے کہ طواف کے دوران بھی لوگ ان کی با پردہ اہلیہ کی ویڈیوز بناتے رہے۔

نجی چینل کے ایک پروگرام میں سابق کرکٹر شاہد آفریدی نے گفتگو کرتے ہوئے کہا کہ طواف کے دوران اپنی با پردہ اہلیہ کی ویڈیوز بنانے والوں کو روکا تاہم وہ نہیں مانے۔ منع کرنے کے باجود ویڈیوز بنانے والوں سے موبائل چھینا تاہم بعد میں معذرت کی کیونکہ وہ خدا کےگھر میں تھے۔

شاہد آفریدی کا مزید کہنا تھا کہ ائیرپورٹ یا عوامی مقامات پر چھپ چھپ کر جو لوگ ویڈیوز بناتے ہیں اس پر افسوس نہیں ہوتا لیکن مقدس مقامات پر منع کرنے کے باجود جو ویڈیوز بنائی گئیں اس پر دکھ ہوا۔ سوشل میڈیا آنے سے لوگوں کی پرائیوسی ختم ہوگئی ہے۔

پاکستان کرکٹ اسٹار نے شکوہ کیا کہ سب کو معلوم ہے کہ وہ ذاتی زندگی کو سوشل میڈیا پر شئیر نہیں کرتے لیکن لوگ پھر بھی ان کے اہل خانہ کی ویڈیوز بنانے کی کوشش کرتے ہیں جو انتہائی غلط ہے۔

شاہد آفریدی کا کہنا تھا کہ وہ سوشل میڈیا کے خلاف نہیں لیکن اس کے استعمال کے لیے تعلیم لازمی ہے۔ پاکستان کے دور دراز علاقوں میں تعلیم تو نہ پہنچ سکی لیکن وائی فائی پہنچ گیا۔ سوشل میڈیا کا استعمال ذمہ داری سے کرنا چاہیے اور یہ پتا ہونا چاہیے کہ کیا صحیح ہے اور کیا غلط ۔