کراچی میں امن و امان کی صورتحال پر وزیراعظم کی سربراہی میں آج اہم اجلاس ہورہا ہے

اجلاس کے دوران کراچی میں امن و امان سے متعلق کئی اہم فیصلوں کا بھی امکان ہے۔ فوٹو: فائل

---

وزیراعظم نوازشریف آج ایک روزہ دورے پر کراچی پہنچ رہے ہیں جہاں وہ شہر میں امن وامان کی صورتحال کا جائزہ لیں گے۔

ایکسپریس نیوز کے مطابق وزیر اعظم نواز شریف اپنے دورے کے دوران کراچی میں امن و امان کی صورت حال کا جائزہ لینے کے لئے اہم اجلاس کی سربراہی کریں گے۔ اجلاس میں گورنر سندھ ڈاکٹر عشرت العباد، وزیراعلیٰ سندھ سید قائم علی شاہ، ڈی جی رینجرز، آئی جی پولیس اقبال محمود کے علاوہ آرمی چیف جنرل راحیل شریف، ڈی جی آئی ایس آئی لیفٹیننٹ جنرل ظہیر الاسلام، کور کمانڈر کراچی، وفاقی وزیر داخلہ چوہدری نثارعلی خان اور ڈی جی آئی بی بھی شریک ہوں گے۔

اجلاس کے دوران ڈی جی رینجرز، ڈی جی آئی بی، چیف سیکرٹری اور آئی جی سندھ وزیر اعظم کو شہر میں امن و امان کی صورت حال، دہشت گردوں، ٹارگٹ کلرز اور دیگر جرائم پیشہ افراد کے خلاف جاری ٹارگٹڈ آپریشن پر بریفنگ دیں گے۔ اجلاس کے دوران کراچی میں امن و امان سے متعلق کئی اہم فیصلوں کا بھی امکان ہے۔