خاتون ملازمہ نے نازیبا الفاظ پر باس کیخلاف کروڑ روپے ہرجانے کا مقدمہ جیت لیا

باس نے میری نسوانی بیماری کا مذاق بنایا جس کے باعث مجھے نوکری چھوڑنا پڑی، خاتون ملازمہ

ویب ڈیسک October 02, 2023

72 سالہ باس نے 49 سالہ خاتون ملازمہ کے مینوپاز کا مذاق اڑایا تھا، فوٹو: امریکی میڈیا

اسکاٹ لینڈ میں مینوپاز کے طعنے، نوکری سے نکالنے اور نازیبا کلمات کہنے پر 49 سالہ خاتون ملازمہ نے اپنے 70 سالہ باس پر مقدمہ دائر کیا تھا جس کا فیصلہ آگیا۔

عالمی خبر رساں ادارے کے مطابق خاتون ملازمہ کیرن ایک انجینئرنگ فرم ''تھیسٹل میرین'' میں 1995 سے کام کر رہی تھیں۔ جہاں انھیں ہتک آمیز سلوک اور امتیازی رویوں کا سامنا کرنا پڑا تھا۔

جس پر کیرن نے عدالت سے رجوع کیا اور باس کے خلاف دائرمقدمے میں کہا کہ میں دو بچوں کی ماں ہوں اور حیض کے بند ہونے کے مراحل (مینوپاز) میں ذہنی دباؤ اور اذیت کا شکار تھی۔ جس کے باعث کام پر دھیان نہیں دے پا رہی تھی۔

کیرن نے عدالت کو بتایا کہ اس پر میرے باس جم کلارک نے طعنہ دیا کہ میں مینوپاز کو ایک بہانے کے طور پر استعمال کر رہی ہوں۔ باس نے یہ بھی کہا کہ ہر ایک کو کوئی نہ کوئی درد ہوتا ہے۔

عدالت نے کیرن کے مقدمے پر فیصلہ سناتے ہوئے باس جم کلارک پر 37 ہزار پاؤنڈ جرمانہ عائد کیا جو وہ خاتون ملازمہ کو ادا کریں گے۔