تجارتی خسارہ 42 فیصد کم صرف 53 ارب ڈالر رہ گیا

درآمدات اور برآمدات میں 3.9 ارب ڈالرکمی ہوئی، زرمبادلہ ذخائر پردباو میں کمی آئی

Shahbaz Rana October 03, 2023

برآمد کنندگان روپیہ سستا ہونیکا فائدہ نہ اٹھا سکے، ٹیکسٹائل سیکٹر سبسڈیز لینے کیلیے سرگرم (فوٹو : فائل)

روپے کی قدر میں نمایاں کمی کے باوجود برآمد کنندگان کوئی فائدہ اٹھانے میں ناکام رہے۔

رواں مالی سال کی پہلی سہ ماہی کے دوران درآمدات پر پابندیوں کی وجہ سے پاکستان کا تجارتی خسارہ 42 فیصد کم ہو کر 5.3 ارب ڈالر رہ گیا ہے، برآمد کنندگان روپے کی قدر میں نمایاں کمی کے باجود کوئی فائدہ نہیں اٹھا سکے ہیں، تجارتی خسارے میں کمی سے زرمبادلہ کے ذخائر پر بڑھتے ہوئے دباو میں کمی ہوئی ہے.

ادارہ شماریات پاکستان نے بتایا ہے کہ جولائی تا ستمبر کے دوران پاکستان کی برآمدات اور درآمدات کے درمیان فرق میں 3.9 ارب ڈالر کی کمی ہوئی ہے، پاکستان کی درآمدات 4.1 ارب ڈالر کی کمی کے ساتھ 12.2 ارب ڈالر رہی ہے۔

تاہم امکان ظاہر کیا جارہا ہے کہ حکومت کی جانب سے درآمدی پالیسیوں میں نرمی کیے جانے اور پابندیاں ہٹانے کی صورت میں درآمدات میں اضافہ ہوگا، پاکستان بھاری مقدار میں خام مال درآمد کرتا ہے، یہی وجہ ہے کہ درآمدات پر پابندیاں صنعتی پیداوار کو سکیڑ رہی ہیں۔

یہ بھی پڑھیں: تجارتی خسارہ اور جاری کھاتہ کو درپیش خسارے میں کمی

گزشتے ہفتے ورلڈ بینک کے حکام نے بھی اپنے خدشات کا اظہار کرتے ہوئے کہا تھا کہ درآمدکنندگان انتہائی ضروری اشیاء کے علاوہ اشیاء کی درآمد میں مشکلات کا سامنا کر رہے ہیں، چند روز قبل حکومت لگژری اشیاء پر 100 فیصد ریگولیٹری ڈیوٹی عائد کرنے کی تجویز کو یورپی یونین کے اعتراضات کی بناء پر رد کرچکی ہے، اس کے علاوہ گزشتہ سال کیے گئے ریگولیٹری ڈیوٹی میں اضافے کے نتائج منفی برآمد ہوئے تھے۔

اعداد و شمار کے مطابق جولائی تا ستمبر کے دوران برآمدات 3.8 فیصد کمی کے ساتھ 6.9 ارب ڈالر رہی، اس دوران برآمدات میں 271 ملین ڈالر کی کمی ریکارڈ کی گئی، ٹیکسٹائل لابی ایک بار پھر علاقائی مسابقتی ماحول کے نام پر سبسڈیز حاصل کرنے کیلیے سرگرم ہوچکی ہے، لیکن تاحال حکومت نے لابسٹ کو ایسی کوئی یقین دہانی نہیں کرائی ہے۔

واضح رہے کہ دہائیوں سے سبسڈیز ڈکارنے کے باجود ٹیکسٹائل انڈسٹری برآمدی سیکٹر میں کوئی خاطر خواہ کارکردگی دکھانے میں ناکام رہی ہے، گزشتہ ایک سال کے دوران روپے کی قدر میں ڈالر کے مقابلے میں تقریبا 60 فیصد کمی ہوئی ہے، جس کا براہ راست فائدہ برآمدی سیکٹر کو پہنچا ہے، لیکن اس کے باوجود ٹیکسٹائل انڈسٹری کوئی نمایاں بہتری دکھانے میں ناکام رہی ہے۔