اٹلی میں سیاحوں کی بس پل سے گر گئی 21 افراد ہلاک

اٹلی میں سیاحوں کی بس کو حادثہ، 2 بچوں سمیت 21 ہلاک اور 12 زخمی۔ فوٹو: رائٹرز

---

اٹلی کے شہر وینس میں سیاحوں کو لے جانے والی بس ڈرائیور سے بے قابو ہوکر پُل سے گرگئی جس کے نتیجے میں 2 بچوں سمیت 21 افراد ہلاک اور 12 زخمی ہوگئے۔

عالمی خبر رساں ادارے کے مطابق حادثے کی شکار بس وینس سے مارگھیرا جارہی تھی اور ریلوے لائن پر بنے پُل پر تیز رفتاری کے باعث نیچے پٹڑی پر گر گئی۔

عینی شاہدین کا کہنا ہے کہ بس پل کی دیواروں کو توڑ کر بجلی کے تاروں پر پھنسی اور پھر پٹڑی پر گر گئی۔ بس میں آگ بھڑک اُٹھی تھی۔ زیادہ تر ہلاکتیں جلنے کی وجہ سے ہوئیں۔

ہلاک اور زخمی ہونے والوں میں غیرملکی بھی شامل ہیں۔ 12 زخمیوں میں سے 4 کی حالت نازک ہونے کے سبب ہلاکتوں میں اضافے کا خدشہ ظاہر کیا جا رہا ہے۔

پولیس کا کہنا ہے کہ ہلاک اور زخمی ہونے والی کی شناخت کا عمل جاری ہے۔ حادثے کی ممکنہ وجہ تیز رفتاری ہوسکتی ہے یا بریک فیل ہونا بھی ہوسکتا ہے۔ تفتیش جاری ہے، کچھ بھی کہنا قبل از وقت ہوگا۔

 

یاد رہے کہ اٹلی میں دنیا بھر سے سیاحوں کی بڑی تعداد سیر و تفریح کے لیے آتی ہے تاہم بس حادثات بھی عام ہیں۔ جولائی 2018 میں بھی 50 سیاحوں کو سیر کے لیے لے جانے والی بس کے حادثے میں 40 افراد ہلاک ہو گئے تھے۔